Эмоциональ ялыгудан ничек котылырга?

Эмоциональ ару-талу халәтеннән үзеңне ничек чыгарып була икәнен әйтегезче? Мин декретта, кызыма 1 яшь 10 ай. Һаман да имезәм. Соңгы вакытта барысы да ярсыта, киеренкелек арта. Кайчак битарафлык та барлыкка килә. Кызым да соңгы арада миңа бик нык беректе. Моңа кадәр әбисе яки әтисе белән тыныч кына кала ала иде. Бәлки, аның шундый чорыдыр. Яисә ул минем борчылуымны тоямы икән?
Адилә Г.

Психолог фикере:

Мин сезне бик яхшы аңлыйм, бу, чыннан да, бик авыр чор. Эмоциональ ару хисен игътибарсыз калдырырга ярамый. Бөтендөнья сәламәтлек саклау оешмасы тарафыннан имезү өчен кулай чор якынча 2 яшькә кадәр дип билгеләнгән. Әмма 1,5 яшьтән соң, әгәр сәбәпләре бар икән, күкрәк сөтеннән акрынлап баш тарта башларга мөмкин.

Педиатрлар фикеренчә, мондый сәбәп булып әнинең эмоциональ яктан арыганлыгы тора ала. Чөнки сезнең халәт турыдан-туры балага тәэсир итә. Әгәр сез инде ахыр чиккә җиткән булсагыз, имезү сезнең өчен дә, бала өчен дә якынлык чыганагыннан киеренкелек чыганагына әйләнә башлый.

Кызыгызның хәзер сезгә нык берегүенә килгәндә, әйе, балалар әниләренең борчылуына бик сизгер. Ләкин шуны аңлау мөһим: бала үсеше өчен аерымлану (сепарация) кирәк. Кызыгыз әтисе яки әбисе белән калырга теләмәсә дә, сез моны акрынлап кертеп җибәрергә тиеш: башта – ярты сәгатькә, аннары бер сәгатькә калдырып китегез. Бу кырыслык түгел, бу – ихтыяҗ. Чөнки әгәр сез үзегезгә ял бирмәсәгез, чикләр куймасагыз, балага тагын да авыррак булачак. Ул һәрвакыт эчтән ярсулы, арыган әнине күрәчәк, аның янында булуы әни өчен авыр икәнен тоячак. Балалар ялганны һәм киеренкелекне бик тиз сизә. Сезнең ярты сәгатькә китеп, аннан тынычланып, көч туплап кайтуыгыз бала өчен күпкә яхшырак булачак.