#Сорау-җавап 13 июль 2018, 09:27

«Кара исемлек»тән ничек чыгарга?

13 июль 2018, 09:27

Кибеттән телевизор сатып алганда, «Альфа банк»тан кредит рәсмиләштердем. Кредитны вакытында түли алмадым, ләкин ахырдан җыеп барыбер түләп бетердем. Хәзер тагын кредит алырга теләгән идем дә, сез кара исемлеккә эләккәнсез, дип хәбәр иттеләр. Кредит бирмиләр. Мин нишли алам икән? «Кара исемлек»тән чыгып буламы? Ф.Сибаева, Мөслим.

Скопировать ссылку

Сезнең мәсьәләдә «Альфа банк»ка мөрәҗәгать иттек. Белгечләр аңлатуынча, кредитны тиешенчә түләп бармасаң, бу мәгълүматны банклар кешенең кредит тарихына терки. Бу исемлек кредит тарихлары бюросына җибәрелә. Нәтиҗәдә, кредитны түләмәүчеләр йә акчаны вакытында исәп счетына күчермәүчеләр «кара исемлек»кә эләгә. Бу исемлек белән теләсә кайсы банк файдалана ала.

Шуңа да «кара исемлек»кә бер эләккән кеше кредитны вакытында кайтармаган банктан гына түгел, башкаларыннан да акча ала алмаска мөмкин. Бу «гомерлек келәймә» кебек тоелса да, аннан чыгарга мөмкин. Әгәр дә түләнеп бетмәгән кредитыгыз бар икән, рефинансирование ясатырга, ягъни булган кредитны кулланучы өчен отышлырак шартлардагы икенче кредит белән түләү мөмкинлегеннән файдаланырга була. Шулай ук кредитны түләү графигын озайтырга, ай саен бирәсе сумманы киметергә дә була. Бурычлардан котылганнан соң, «кара исемлек»тән чыгартуны банк җитәкчелеге белән хәл итәргә кирәк. Үзеңнең ышанычлы клиент икәнлегеңне раслауда торак-коммуналь хезмәтләргә бурычларың булмау да йогынты ясый. Кредит алганда, залог буларак тәкъдим итәрлек милкең булу да булыша.

Аңлавыбызча, укучыбыз кредитын түләп бетергән. хәзер аңа акча алырга теләгән банкның җитәкчелеге белән сөйләшергә кирәк булачак. Банк тарафыннан гамәлләр гаделсез дип санасагыз, Роспотребнадзорга шикаять юлларга мөмкин.

Кызыклы яңалыкларны күзәтеп бару өчен безнең МАХ каналына кушылыгыз.