Әгәр дә мәчең өеңдә генә торса, аңа котыру чиренә каршы вакцина ясату мәҗбүриме?
Сания Җиһаншина, Казан.
Татарстан Министрлар Кабинеты Ветеринария буенча баш идарәсенең инфекцияле авыру хайваннар һәм аларга каршы эпизоотик чаралар оештыру бүлеге җитәкчесе Александр Козлов җавап бирә:
– Барлык йорт хайваннарына да вакцина ясатырга кирәк. Аларның хуҗалары өйдә генә тормый бит, урамга да чыга. Үзләре белән котыру чире вирусын ияртеп алып кайтырга мөмкиннәр. Мәчеләр яки этләр аннан зыян күрми дигән бернинди дә гарантия юк. Практикадан күренгәнчә, мондый очраклар еш була. Мәчем өйдә генә тора бит, ди безгә хуҗалары. Ә лаборатория тикшеренүләре котыру авыру фактын күрсәтә. Котыру чиренә каршы вакцина мәҗбүри ясалырга тиеш. Әлеге чирне булдырмас өчен, республиканың барлык район-шәһәрләрендә йорт хайваннарына бушка вакцина ясыйбыз. Ел саен 100 мең эт һәм мәчегә прививка ясатыла. Авыл җирләрендә терлекләргә вакцина ясатуны контрольдә тотып була, ә менә шәһәрдә барлык эт яки мәчеләргә дә вакцина кадала дип әйтеп булмый, барысы да хуҗаларының намусыннан тора.
Кызыклы яңалыкларны күзәтеп бару өчен безнең МАХ каналына кушылыгыз.
Комментарийлар