#Сорау-җавап 29 сентябрь 2018, 08:42

Пай җире өчен түләү ничек башкарыла?

29 сентябрь 2018, 08:42

Ни сәбәпледер быелгы пай җирләре өчен печән бирмәделәр. Ашлык белән генә кайтардылар. Башка елларны печәнен дә, ашлыгын да бирәләр иде. Без моңа дәгъва белдерә алабызмы? Шуны да аңлатып язсагыз иде, бер гектар пай җире өчен милекчегә ничә сум акча бирелергә тиеш? Зәлия Мәҗитова, Азнакай.

Скопировать ссылку

Әлеге сорауга Татарстанның авыл хуҗалыгы һәм азык-төлек министры урынбасары Илдус Габдрахманов аңлатма бирде.

– Әгәр бүген мин пайчының җирен арендага алам икән, аның белән килешү төзергә тиешмен. Килешүдә җирдән файдаланган өчен нәрсә белән түләнәчәге ачык күрсәтелә – ашлык беләнме, печән беләнме, акчалатамы. Татарстанда печән белән генә дә, ашлыклата да, акча гына түләүчеләр дә бар. Җирдән намуссыз файдаланучыларны мәҗбүри түләтә алмасак та, йогынты ясарга хакыбыз бар.

Безнең күрсәтмәләр буенча, бер гектар пай җиренә 700 сумнан да кимрәк түләнергә тиеш түгел. Милекчегә аренда хакын күбрәк бирергә ярый, кимрәк булса – дөрес булмый. Бүген республикада пай җирләрен кулланган өчен исәп-хисап эшләре бара. Тулырак мәгълүмат ел ахырында билгеле булачак, – диде Илдус Габдрахманов.

Кызыклы яңалыкларны күзәтеп бару өчен безнең МАХ каналына кушылыгыз.

#пай җире