Инвалид балалары булган ата-аналар үзләренә тиешле дару ала алмый

Биредә төп доклад белән  Татарстан Республикасында Кеше хокуклары буенча вәкаләтле вәкил Сәрия Харис кызы Сабурская чыгыш ясады. Спикер хокук саклау эшчәнлеге өчен дә узган ел шактый катлаулы булды, дип билгеләп үтте.

«Эпидемиядән чигенмәү һәм аның масштабын арттырмас өчен билгеләнгән чикләү чаралары аркасында, сәламәтлек саклау, Россия Федерациясе гражданнарының хезмәт хокукларын үтәү, социаль ярдәм чаралары күрсәтү мәсьәләләренең мөһимлеге артты», - диде Сабурская. Аның сүзләреннән ачыкланганча, торак мөнәсәбәтләре, мәгариф, экология һәм кеше тормышының башка мөһим өлкәләрендәге аерым мәсьәләләр дә актуальлеген югалтмаган.

2021 елда Татарстанда Кеше хокуклары буенча вәкаләтле вәкил аппаратына җирле халыктан торак һәм хезмәт хакы белән бәйле бихисап мөрәҗәгатьләр килгән. Мисал өчен, республикадагы бер оешманың үзенең эшчеләренә 47 млн сум бурычы барлыгы ачыкланган. Шулай ук инвалид балалары булган ата-аналарның тиешле даруларны ала алмаулары да көн кадагында торган мәсьәләләрнең берсе.

“Халык контроле” системасына 83 763 мөрәҗәгать килгән. Шуларның 65 566сы уңай хәл ителгән. 5 654е нигезле сәбәпләр аркасында кире кагылган.
2020 елдагы хезмәткәрнең сәламәтлегенә зур зыян килгән бәхетсезлек очраклары буенча да оешмаларда тикшерүләр үткәрелгән. 2021 елда Татарстан Республикасы Урман хуҗалыгы министрлыгы, Бөгелмә районы башкарма комитеты, Чаллы шәһәре муниципаль берәмлеге башкарма комитетында  тикшерүләр булган. Агымдагы ел планына Татарстан Республикасы мәгариф һәм фән министрлыгы, ТР Сәламәтлек саклау министрлыгы, Яшел Үзән районы башкарма комитеты кертелгән. Узган елда социаль яклау сораулары буенча 365 мөрәҗәгать кергән.

Бер ел эчендә Татарстанның 200ләп сәүдә үзәге һәм алар янәшәсендәге территорияләр инвалидлар өчен уңайлы мохит булдыруга тикшерелгән. «Үткәрелгән тикшерү нәтиҗәләре буенча сәүдә үзәкләре администрацияләренә булган җитешсезлекләрне бетерү турында күрсәтмәләр бирелде», — дип билгеләп үтте Сәрия Сабурская.