Казанның биш балалар бакчасы август аенда капиталь ремонттан соң ачылачак

Эшләр, шул исәптән, сәламәтлек үзенчәлекләре булган балалар өчен учреждениеләрдә дә бара.

Мәскәү районында Восстание урамындагы 231 нче балалар бакчасын яңарту дәвам итә. Капиталь ремонт барышында бинаның нигезе ныгытыла, иске коммуникацияләр һәм түбәсе алыштырыла. Бүгенге көндә эшләр 65% ка башкарылган. Ачылудан соң мәктәпкәчә учреждениедә интеллекты бозылган балаларны тәрбияләү өчен шартлар тудырылачак: дефектологлар һәм логопедлар кабинетлары, шулай ук психологик бушану өчен махсус сенсор бүлмәсе барлыкка киләчәк. Балалар бакчасына 40 бала йөри алачак.

Казанның Идел буе районында Завойский урамындагы 163 нче балалар бакчасына капиталь ремонт ясала. Бина авыр хәлдә була, шуңа күрә терәк балкаларны ныгыту, нигезне гидроизоляцияләү, фасадны җылыту таләп ителә. Узган ел балалар бакчасына керү төркемнәре ремонтланды, тәрәзәләр алыштырылды, түбә һәм электр монтажлау эшләре башкарылды, ә августка биналарны бизәү һәм территорияне төзекләндерү эшләре тәмамланачак. Бүгенге көндә оператив башкару 68%. Ачылудан соң балалар бакчасына 150 бала йөриячәк. Учреждение эшенең юнәлешләре арасында – татар телендә тәрбияләү һәм укыту, татар халкының мәдәнияте һәм традицияләре белән танышу, танып белү-сөйләм үсеше.

Шәһәрнең Авиатөзелеш районында Яшьләр урамындагы 308 нче балалар бакчасы ремонтлана. Эшләр 77% ка башкарылган. Балалар бакчасына 220 яшь казанлы йөриячәк. Учреждениедә ике телдә чаралар үткәреләчәк, сөйләме бозылган балалар үсешендә кимчелекләрне төзәтү һәм балаларны балалар бакчасы шартларына яраклаштыру өчен гаиләләр белән эшләү оештырылачак.

Казанның Совет районында берьюлы ике мәктәпкәчә учреждение ремонтлана. Мәсәлән, Новаторлар урамындагы 155 нче балалар бакчасында ремонт 41% ка башкарылган. Ачылудан соң аңа үсеш үзенчәлекләре булган 40 бала киләчәк. Учреждение эшенең төп юнәлеше 3-7 яшьлек балаларда психик тайпылышларны төзәтү.

Отрадная урамындагы 377 нче балалар бакчасында капиталь ремонт финиш турысында – оператив үтәлеш 87% тәшкил итә. Август аенда учреждение 120 нәни казанлыны кабул итәчәк. Балалар бакчасында танып белү-сөйләм һәм физик үсеш буенча дәресләр үткәреләчәк.

Исегезгә төшерәбез, соңгы 10 елда шәһәрдә 86 балалар бакчасы капиталь ремонтланган.

Чыганак: Казан мэриясе сайты