Шикләнергә түгел, сөенергә кирәк

Киров районында Кызыл Кокшай урамы, 156 нчы йортта элек балалар бакчасы иде, 1999 елларда ул төрек-татар лицее итеп үзгәртелде. Хәзер биредә нәрсә икән? Балаларны күргән дә юк, мәктәп тирәсендә гел ир-атлар йөри, бина ниндидер шикле оешманы хәтерләтә. Бу бинаны тикшерсәгез иде.

Галина Чумаченкова, Казан.

Кызыл Кокшай урамы, 156 нчы йортта Әхмәтһади Максуди исемендәге агарту үзәге урнашкан. Элек бу оешма «Ак өмет» хәйрия пансионаты дип атала иде. Ничек кенә булмасын, оешманың максаты бер - балаларга дин сабаклары бирү, шәригать кушканча укыту. Бина тирәсендә гел ир-атларның йөргәненә гаҗәпләнәсе юк, биредә малайлар гына укый. Үзәк интернат тибында, мәктәптә үк яшәү мөмкинлеге дә бар. Шулай ук авыр хәлдә калган, аз керемле гаиләдәге балаларга да ярдәм күрсәтелә. Оешма - Татарстан Диния нәзарәте карамагында. Диния нәзарәтенең пропаганда бүлеге җитәкчесе Нияз хәзрәт Сабиров әйтүенчә, мондый оешмалардан шикләнергә түгел, алар булганга сөенергә кирәк. Шулай ук бинада шәмаилләр күргәзмәсе дә эшләп килә.