2026 елда Муса Җәлил турнирының кайда узачагы билгеле

Журналистлар иң элек матбугат конференциясендә катнашкан халыкара категорияле хөкемдар, Муса Җәлил турнирларының 3 тапкыр җиңүчесе Рамил Хисмәтуллиннан бу турнирны кабат Чаллыда уздыру теләге юкмы дип сорады. Билгеле булганча, киләсе елда Чаллының 400 еллыгы һәм «КаМАЗ» машиналарның чыга башлавына 50 тулуга багышланган юбилей чаралары узачак. «Теләгебез зурдан. Иншаллаһ, Чаллының зур юбилеена бирерләр дип өметләнәм. Безгә бирсәләр, без аны югары дәрәҗәдә уздырачакбыз. Безнең андый мөмкинлекләр бар, егетләребез бар», диде Рамил. Аның сүзләренә караганда,бүгенге көндә Чаллы шәһәре башлыгы Наил Мәһдиев тарафыннан көрәшчеләргә хәерхаклы мөнәсәбәт урнашкан. Ә көрәш федерациясе җитәкчесе Марсель Мингалимов федерация башында торучы егетләргә һәрдаим ярдәм кулы сузарга әзер.

Шуннан соң Татарстан спорт министрының беренче урынбасары Хәлил Шәйхетдинов та әңгәмәгә кушылды. «Киләсе елга Чаллының юбилей чаралары программасына Муса Җәлил турнирын уздыру да кертелгән. Шуңа күрә ярыш Чаллыда узар дип планлаштырыла», дип белдерде ул.