«Бәлеш булырмы, казмы, белмим әле» яки Айрат Гыйлаевка 50 яшь!

Татар көрәшендәге: "Көрәшче булсаң, Гыйлаев кебек булырга кирәк", - дигән гыйбарә, шушы бер җөмлә барысын да үз эченә ала. Бөтен көрәш дөньясындагы халык ярата, хөрмәт итә үзен. Күп көрәшчеләрнең кумиры ул - Айрат Гыйлаев. Элегрәк тә язганым бар иде, көрәшнең "к" хәрефен дә белмәгән дус кызларым да Айрат Гыйлаев исемен яхшы белә. "Он же легенда!" - ди алар да сокланып. 
Юбилее уңаеннан, Айрат абыйга шалтыратып алдым әле. Рәхәт бер сөйләшү булды. Шулай гади булып калуы өчен дә рәхмәт аңа. Сөйләшү ике арада гына калмасын, сезнең белән дә уртаклашам. Гыйлаев күп булмый!)

-Айрат абый, 18 яшьлегегез белән котлап шалтыратам әле. Ничек соң хәлләрегез? Туган көн кәефе ничек? 
-Рәхмәт, Лилия! Бик приятно. Туган көн кәефе "икелелек" (көлешәбез). Туган көнгә әллә ни исем китми, яратып та бетермим. Юбилей булгач, болай гына, шыпырт кына үтеп китеп булмый инде. Мәшәкате аз түгел. Шимбә мәҗлес үткәреп алырмын, дип торам. Бүген гаиләм белән өйдә генә табын корып оешып алырбыз шунда. Хатыным эшләр белән чыгып киткән иде әле. Аннары өстәл әзерли.

-Бәлеш пешертәсезме, казмы, дигәндәй.
-Карарбыз инде. Кайсы да ярый. Икесе дә тәмле).

-Котлаулар бииик күптер, Айрат абый?
-Иртәдән кулдан телефон төшми. Әле кайбер социаль челтәрләрдә җавап бирергә өлгермәдем. Әлбәттә, котлаулары, хөрмәтләп искә алулары өчен, һәркемгә рәхмәт! Әле менә өйгә көрәшче Азат Габдрәшитов килеп котлап китте. Бик хөрмәт итәм аны. Шимбә мәҗлестә була алмый. Шуңа бүген өйгә килгән. Гомумән, безнең Чаллы командасында бердәмлек, хөрмәт көчле. Ярышларга да йөрергә тырышабыз. Чаллы командасы өчен йөрергә дә була!