Фәрит Шәйхетдинов: «Талантлы көрәшче шәкертләремнең берсен югалттым...»

Фәрит Шәйхетдиновның заманында туган авылында (Яшел Үзән районы Олы Карауҗа авылында) бик көчле егетләр тәрбияләп үстергәнен беләбез. Бер авыл егетләре район командасының төп нигезен тәшкил итәләр ул чакта. Үз егетләре белән Фәрит абый һәрчак горурланып сөйли. Шундыйларның берсе – Илдар Гайнуллин вафат булган икән.

- Бик талантлы көрәшче шәкертләремнең берсен югалттым. Шушы көннәрдә Илдар Гайнуллинны җирләдек, – дип башлады сүзен Фәрит Шәйхетдинов. – Өч бертуган иде алар – Илгиз, Илдар, Зөфәр Гайнуллиннар. Илдар – Илгизнең энесе. Өчесе дә көрәште, өчесе дә республика ярышларында алдынгы урыннарда булды. Илдар яшьләр арасында Татарстан, Россия чемпионы исемен яулады. 1979 елда 17 яшендә, ягъни 10нчы классны тәмамлаган чагында Илдар Муса Җәлил турнирында финалда көрәшеп, икенче урынны яулады. Бик көчле саналган 80 килода Марат Әхмәдиев белән көрәшкән иделәр ул чакта. Ике тапкыр Татарстан беренчелегендә икенче урыннарга ия булды, шулай ук грек-рим көрәше белән дә шөгыльләнде. Педагогика институтының физкультура факультетын тәмамлады. Шактый еллар мәктәптә физкультура укытучысы булып эшләде. Заманында Залесный бистәсендәге спорт залында үземнең урынга да нәкъ менә Илдарны калдырган идем. Яшел Үзән, Лаеш районнарында абсолют батыр исемен яулады. Ни өчен Лаеш, чөнки анда да физультура укытучысы булып эшләп алды ул.

Бер елны дуслары чакыруы буенча Нурлат районы Сабан туена барып чыккан. Кайткач сорыйм моннан ничек көрәштең соң дип. «Фәрит абый, абсолют батыр өчен көрәшкәндә ниндидер бер таза гына колхозникка җиңелдем», ди елмаеп. Көндәше атаклы Хәбил Бикташев булган икән. Шундый юморлы кеше иде мәрхүм. Берара әле весын киметеп, тагын миңа йөреп алды. Намазда иде, соңгы елларда туган авылында яшәде. Соңгы юлга озатырга да бик күп кеше килгән иде. Илдарның урыны җәннәттә булсын!