Казанда көрәш буенча командалар беренчелеге уза

Биредә 29 командадан 250гә якын көрәшче бил алыша.

Ярыш "стенка на стенку" принцибы буенча уза. Командаларга 9 авырлык категориясендә көрәшчеләр тупланган. Командалар көрәшендә авырлык  категорияләр буенча сан ягыннан иң күп җиңү яулаган команда - җиңүче. 

- Бу ярышка команда туплау кыенрак. Авыр һәм җиңел авырлык категориясе буенча көрәшчеләрне табу авыр. Команда тулы булмагач, район ярышта катнаша алмый. Әлбәттә, бу көрәштә катнашкан районнарда көрәш яши дигән сүз. Командаларны җирәбә үткәреп бүлдек. Беренче әйләнештә үк ике көчле команда эләкте. Нишлисең инде, спортта шулайрак, - диде Дәүләт Думасының физик культура һәм спорт буенча комитеты әгъзасы Рөстәм Кәлимуллин.  

Көрәш Федерациянең башкарма директоры Марсель Таһиров сүзләренчә бу ярышның 25 еллык тарихы бар.
- Ярыш моннан 25 ел элек, безнең республиканың үзенчәлекләрен исәпкә алып, үткәрелә башлаган. Моңа өстәп, ярыш - Көрәш федерациясенең календарь планына кергән. Биредә 17-18 яшьлек егетләр җыелды, бу күчеш чоры да. Күп кенә егетләр Сабан туйларда да көрәшәләр. Ярышның төп максаты үзгәрми: барыбыз да көрәшне популяштыру өчен эшлибез, - ди ул. 

Җиңүче командаларга акчалата бүләк каралган. Җанатарлар өчен керү ирекле.