Көрәш федерациясендә яңа президент? Яки Муса Җәлил турнирында нәрсәләр көтелә

– Көрәшчеләр арасындагы көндәшлек елдан ел арта. Егетләребезнең шактый зур өлеше махсус хәрби операция зонасында. Әлеге турнирда катнашучылар да җиңүчеләр, алар күпчелек ярышларда беренче урын алган спортчыларыбыз. Милли көрәшне популярлаштыру өстендә көн саен киң кырлы эш алып барыла. Тамашачылар да ярышларга теләп киләләр. «Манзара»да халыкка билет җитмәде. Аншлаглы ярышлар минем хыялым иде, - диде Татарстан спорт министрының беренче урынбасары Хәлил Шәйхетдинов. Шулай ук ул шимбә көнне Татарстан көрәш федерациясенең президентын сайлаулар булачагын да искәртте. Кем булыр – анысын әйтеп бетермәде. 
“Ватаным Татарстан” газетасының баш мөхәррире Илназ Фазуллин ярышларга тамашачыларны җәлеп итүне мөһим дип искәртте: 
– Ярышлар алдыннан махсус театральләштерелгән тамаша булачак. Әсхәт Хисмәт, Резедә Сәлахова төп рольләрне башкарачак. Шулай ук тамашачылар арасындагы махсус бүләкләр уйнатылачак. Ярышлар мавыктыргыч булачак, барлык тамашачыларны көтеп калабыз. 
Әлеге турнирның рекордлы – 12 тапкыр җиңүчесе Айрат Гыйлаев ярышлардагы конкуренциягә тукталды. 
– Бу ярышларда кем җиңәчәген алдан фаразлап булмый. Бөтенесе диярлек үзләренең пик формасында киләләр. Минем рекордка килгәндә, кайчанда булса бу рекордны узарлар дип уйлыйм. Дөнья булгач, шулай булырга тиеш инде ул. Егетләрнең һәрберсенең үзләренә генә хас алымнары бар көрәш барышында. Ярышларда инде аларның әзерлеген һәм кем җиңүче булачагын күрәчәкбез. 
Чаллы шәһәре Көрәш федерациясенең башкарма директоры, халыкара категорияле хөкемдар, каһарман-шагыйрь Муса Җәлил истәлегенә уза торган көрәш турнирының 3 мәртәбә җиңүчесе Рамил Хисмәтуллин көрәш кагыйдәләренең үзгәрүен уңай дип бәяләде:
– Без дә көрәш ярышларында катнашып, чемпион булган егетләр. Үзебезнең тренерларның, үрнәк көрәшчеләребезнең чыгыш ясаганын күреп үстек. Татар көрәшендә кагыйдәләр дә үзгәрә. Төрле үзенчәлекле яклары бар. Ел буена хөкемдарлар өчен семинарлар үтте, көрәш вакытында барлыкка килгән төрле ситуацияләрне ачыкладык.
Әлеге ярышта беренче урын алган көрәшчегә – 100 мең, икенче урынга – 70 мең, өченче урынга 50 мең сум акча биреләчәк. Шулай ук матур көрәш алымы кулланган махсус бүләк 30 мең сум акчалата бүләк ителәчәк. Соңгысы “Ватаным Татарстан” газетасы тарафыннан легендар көрәшчебез Ильяс Галимов истәлегенә булдырылган махсус премия.

Илнар Камаев