Олимпия уеннарында җиңгән Артур Әхмәтхуҗин белән Тимур Сафин Татарстанныкы түгелме?

Рио-де-Жанейрода бара торган Җәйге Олимпиадада Россия ир-атлар җыелма командасы фехтование буенча беренче урынны алды. Команданың ике спортчысы татар фамилиясен йөртә. Алар безнең Татарстан егетләреме?

Рәис Нигъмәтуллин, Казан.

Артур Әхмәтхуҗин, Тимур Сафин һәм Алексей Черемисиновтан торган команда Олимпиадада уңышлы чыгыш ясады.

Россия җыелма команда составындагы Тимур Сафин 1992 елның 4 августында Ташкентта туган, Башкортстанда яшәгән. Фехтование белән 2001 елдан бирле шөгыльләнә. 15 яшендә Россиянең спорт мастеры дәрәҗәсенә күтәрелгән. Иң югары шәхси күрсәткечләре: 2014 елгы дөнья чемпионатында өченче урынны, Рио-де-Жанейродагы Олимпиадада шулай ук өченче урынны ала.

Артур Әхмәтхуҗин 1988 елның 21 маенда Башкортстанның Краснокама районы Яңа Актанышбаш авылында туган. Уңышлары: 2013 елда дөнья чемпионатында - көмеш медаль, 2015 елдагы дөнья чемпионатында көмеш һәм бронза медальләр, 2016 елгы Европа чемпионатында - алтын медаль.

^{Фото: www.kp.ru}