Ранис Галимуллин: “Бәхет елмаер әле дип уйлап кына, келәмгә чыкмыйлар...”

Теләче районының Олы Мишә авылында туып-үскән көрәшчебез Ранис Галимуллин сокландык әле. 32 яшенә кадәр келәмдә көч сынашып, олы дәрәҗәләргә ирешкән: ул 4 мәртәбә Россия һәм Татарстан чемпионы, 3 тапкыр Муса Җәлил исемендәге көрәш турниры, БРИКС уеннары җиңүчесе. Ел ярым элек кенә көрәштән киткән. Ни дисәң дә, өч бала әтисен бер яктан тормыш басса, икенче яктан ул барыбер көрәш спортында, тик хәзер иганәче сыйфатында. 
– Ике кызымнан соң ел ярым элек кенә төпчеге – улым туды. Үз бизнесым – газофикация юнәлешен колачлаган оешмамны булдырдым. Аллаһыга мең шөкер, эшлибез. Көрәшче егетләрне дә ташламыйбыз. Күңелләре үссенгә матди ярдәм җәһәтендә терәк була алсак, республикабызга әле байтак еллар буена яшь көрәшчеләр әзерләргә ышаныч бар, – ди ул. 

Ранис Галимуллин белән Теләче районы хакимият башлыгы кубогына оештырылган көрәш турнирында да күрешкән идек. Анда да ул 150 мең сум тирәсе матди ярдәм күрсәтте.  
– Хәзер көрәш – профессиональ спорт төренә әйләнде. Ә күтәрелгән югарылыкны сакларга, даими рәвештә яшь көрәшчеләр тәрбияләргә кирәк. Үсеш булсын, шөгыльләнсеннәр, сайлаган юлларыннан тайпылмыйча ипле генә алга барсыннар өчен дә турнирларны даими оештыру мәслихәт. Ә ярдәм, булышлык күрсәтүдә тарсынып тормабыз. Ни дисәң дә акчалата кызыксындыру нәфесне генә түгел, күңелне дә үсендерә, теләкне дә көчәйтә, – ди Ранис. 

Теләчедә Рафис Сәмигуллин тренерлыгында келәмгә баскан егет, Илдар Хәбибуллин, Динар Кәримуллин кулы астында чемпион осталыгына ирешә. Инде үзенең дә тәҗрибәсе саллы, кем әйтмешли, үзе тренер булырлык. 
– Бабай көрәшче иде, әти көрәшмәде. Бертуган энем балалар көрәшендә бил алышты да, үскәч, көрәш мәйданы янына якын да килмәде. Ә мин менә кулдан сөлге төшсә дә һаман да келәм исен исним әле. Көрәшәсе килә. Ләкин үз вакытыңны белеп киткәнсең икән, кем әйтмешли, хисләргә ирек бирергә ярамый. Вакыт табып атнасына 3-4 тапкыр спортзалга барып кайтам анысы. Яшь көрәшчеләргә киңәшем шул, көн саен ике мәртәбә икешәр сәгать спортзалда шөгыльләнергә кирәк. Әйбәт туклану шарт. Дөрес тукланмасаң, синең спортзалда тырышуларын да юкка гына була. Аннары 8 сәгать йоклау да мөһим. Келәмдә җиңү син көткән, син өметләнгән вакытта килмәскә дә мөмкин. Туктап калмаска, аның өчен ихтыяр көчен югалтмаска кирәк. Фортуна келәмдә елмаймый ул, бәлки бәхет елмаер әле дип уйлап кына, келәмгә чыкмыйлар. Туктаусыз шөгыльләнү, үз өстеңдә эшләү, тренер кушканнарын төгәл үтәү генә уңышка китерә. Кайчагында, шул кадәр гөрселдәп килеп төшәсез, ул кабыргаларыгыз ничек сынмый соң, диләр. Сынмый, әлбәттә. Тренерлар бит егарга да, дөрес итеп егылырга да өйрәтәләр, – ди ул. 

Тагын  шунысын да әйтми булмый, Ранис Галимуллин “Шәһри Казан. Язмыш” газетасын яратып укучыларыбызның берсе дә әле. Ул быел авылдашларына да безнең газетаны бүләк итеп яздыртты. Рәхмәт аңа!