Владимир Леонов: «Мондый Конфедерацияләр Кубогы башка кабатланмас»

- Казан матчларны каршы алырга йөз процентка әзер. Португалия - Мексика арасында узачак беренче матчка инде билетларның яртысыннан артыгы сатылды. Безнең халык соңгы көнне генә "уяна". Шуңа да матч көнне стадион 80-90 процентка тулыр дип уйлыйм. Һава торышы нинди булуга карамастан, матч булачак, - диде Владимир Леонов.

Министр халыкны Конфедерацияләр Кубогыннан читтә калмаска өндәде.
- Кубок мондый составта Казанга бүтән кабатланмаячак. Әле кайчан Роналду, Германия, Россия җыелмасы Казанга килер иде? Мин хәзер министр буларак түгел, ә шәһәрне яраткан кеше буларак сөйлим. Без бу чараларны халык өчен оештырабыз. Казан үзгәрде, тагын да матурланды. Без Рубин - ЦСКА арасында сынау матчын үткәрдек инде.

"Яндекс-пробки" кушымтасында бөке балларын тикшердек. Шуңа күрә бөкеләрдән дә, ыгы-зыгыдан куркырга кирәкми, - ди Владимир Леонов.

Министр матч булган көннәрдә транспорт хәрәкәтендәге үзгәрешләрне дә искәртте. Җанатарлар - билет һәм Fan-ID паспорты, FIFA аккредитация уздырган кешеләр - аккредитация бейджы һәм транспорт картасы белән җәмәгать транспортыннан бушлай файдалана ала. Шулай ук матч булган көннәрдә Казан, Мәскәү, Санкт-Петербург шәһәрләре арасында поезда бушлай йөрергә мөмкин.

Иртәгә, 17 июнь көнне, Санкт-Петербург шәһәрендә Россия җыелмасы Яңа Зеландия белән уйный. Матчны 18.00 сәгатьтә "Беренче канал" һәм "МатчТВ" каналлары аша карап була.