“Зилант” чемпионнарын шәһәрдә зурдан кубып каршы алдылар

Ил чемпионаты уеннары ике көн дәвамында Мәскәүнең “Динамо” пляж спорты үзәгендә узды. Ир-егетләр арасында турнирның фавориты саналган Казанның “Энергия” командасы финалды Самара җыелмасына оттырса (6:8), кызлар егетләр өчен реванш алды – хәлиткеч уенда “Торпедо-Трудовые резервы” командасыннан өстен чыкты (6:5).

3 август иртәсендә “Зилант” командасын Казанда зурдан кубып каршы алдылар.
– Бер уенчыны да аерып күрсәтәсем килми, командамнан тулысынча канәгатмен, – дип фикерләре белән уртаклашты “Зилант”ның баш тренеры Ришат Абдрахманов. – Призлы урын яулау өмете белән бардык һәм планны арттырып та үтәдек.
Команда капитаны Айгөл Хөсәенова да остазны куәтләде генә.

– Көндәшләр – көчле иде, шуңа да һәр уен тигез шартларда узды. Әмма без Казан белән исәпләшергә кирәклеген исбатладык, – ди капитан.  
...Табадан төшкән чемпион кызларны кайда күреп була, дисезме? 5 августта Казанның “Стрела” командасы үз кырында Россия чемпионаты кысаларында “Металлург” белән очраша. Әлеге уенны “Зилант” кызлары да тамаша кылачак һәм аларны бүләкләү чарасы да көтелә, ди. Ике куянның койрыгын менә шунда тотып булачак.

Фото: http://facebook.com