Балалар арасында психик авырулар арта

Сыйфатсыз памперслар, балалар өчен онкология үзәге, психик авыруларның артуы... Татарстанда “Бердәм Россия” ярдәме белән оешкан оператив үзәкнең беренче утырышында белгечләр балалар сәламәтлеген саклау турында сөйләште.

Әлеге үзәк халыктан килгән сорауларны кабул итә, бу депутатларга күпчелекне борчыган актуаль мәсьәләләрне ачыкларга, чишү юлларын эзләргә юнәлеш бирә. “Һәр шикаять бүләк кебек, министрлыкларга кайсы юнәлештә эшләргә кирәклеген күрсәтә”, – диде чараны алып баручы Дәүләт Думасы депутаты Айрат Фәррахов.

Беренче тема итеп балалар сәламәтлеге сайлануы юкка түгел, чөнки бүген бу Татарстанда приоритетлы өлкәләрнең берсе. Республикада яшәүченең һәр дүртенчесе – бала. Балалар сәламәтлегенә кагылышлы дәүләт программалары, илкүләм проектлар җитәрлек. Бу өлкәдә аерым система булдырылган. Тиздән 1 июнь – Халыкара балаларны яклау көненә Казанда балалар онкологиясе үзәге ачылыр дип көтелә. Ул республикадагы авыруларга гына түгел, Идел буе төбәгендәге башка балаларга да хезмәт күрсәтәчәк. Моннан тыш Татарстан сәламәтлек саклау министры Марат Садыйков балалар өчен ачылырга тиешле башка медицина учреждениеләрен дә искәртеп узды. Ни дисәң дә, бүген югары технологияле медицина ярдәме күрсәтә торган иң зур дәвалану үзәге – ул бердәнбер Республика балалар клиник хастаханәсе. Казан халкының 30 проценты балигъ булмаган балалар икәнен исәпкә алсаң, өстәмә хастаханәләргә ихтыяҗ зур. 

2020 ел нәтиҗәләре буенча республикада 1,7 мең балага инвалидлык группасы бирелгән. Бу 2019 ел белән чагыштырганда 7 процентка азрак булса да, Татарстанның медик-социаль экспертиза баш бюросы җитәкчесе Ригель Низамов әйтүенчә, өч яшькә кадәрге балаларда тумыштан килгән кимчелекләр күзәтелсә, зуррак балаларның күбесен психик авырулар сәбәпле исәпкә куялар. 

Айрат Фәррахов исә бу мәсьәләгә битараф калырга ярамаганлыгын белдерде.
– Балалар коронавирус белән авырмады дп уйлыйбыз. Ләкин пандемия шартларында аларның күбесе игътибарсыз, телевизор белән икәүдән икәү калды. Балаларда депрессия синдромнары барлыкка килде, үзенә кул салучылар да очрый. Шуңа да коронавирусның балаларга йогынтысын анализлап фәнни конференция уздырырга тәкъдим итәм, – диде ул. 

Авыруны булдырмас өчен иң яхшысы алдан кисәтү. Бу өлкәдә республика клиник хастаханәсенең баш табибы Рафаэль Шәвәлиев кисәтү чараларына зур басым ясарга, балалар арасында диспансеризация системасын җайга салырга өнди. 

Медицинада иҗтимагый оешмаларның роле дә зур. Мәсәлән, нәкъ менә инвалид балаларның әти-әниләре ярдәмендә алты фура машинасы сыйфатсыз подгузникларны ачыклый алган. Памперсларны алыштырып бирәчәкләр. 

Чарада халыкны борчыган башка сораулар да яңгырады. Белгечләр аларны мөмкин булганча хәл итәргә тырышачак.