Әкияткә ышанмагыз, тизрәк вакцина ясатыгыз!

Шунысы кызык, ялларда авылда бераз физик эш белән шөгыльләнгән идем, шунда җил өргәндер дигән фикер белән берничә көн яшәдем бит әле. Аннары температура күтәрелде һәм, әлбәттә, ис һәм тәмне аермый башладым. Шул ук вакытта йөткертә, әмма минем өчен бу бик сирәк күренеш булды. Шунда инде үзеңнең теге зәхмәтне эләктергәнеңне аңлыйсың. Эчке халәтең шулай ди, әмма акылның бер дә коронавирус  белән чирләгәнне кабул итәсе килми. Ничек инде, аның хакында телевизордан гына сөйлиләр бит, миңа тия алмый ул дигән уйлар еш керә. Әле җитмәсә саклану чаралары күрәсең, җәмәгать урыннарында маска да киеп йөрисең.

Табиб Арбидол белән төрле витаминнар эчәргә киңәш итә. Миңа бәхет елмайды: берничә көннән соң ис һәм тәмне аера башладым, температура да бетте һәм барысы да үз урынына кайтты.

Ә бит без инфекцион сырхауханәләрдән бигрәк тә куркыныч кадрлар күрәбез. Күз алдыгызга китерсәгез иде шул авырудан соң урамга чыгып, саф һава сулау нинди зур шатлык икәнен! Ләкин бүген җәмгыятьтә коронавирус белән бәйле хәлләр бик мөшкел шул. Илебез буйлап авыруларның бермә-бер артуы турында сөйлиләр һәм зур чараларны уздырмаска дигән фәрман чыгаралар. Ә бу ни өчен шулай соң? Моның иң зур сәбәбе - халыкның бик сүлпән генә вакцинация узуы. Моны күпләр хакимияткә протест буларак эшлиләр, янәсе каршы килим әле бераз. Тик бу дөрес чара түгел, үзең утырган ботакны чабудан ни файда?

Хәтерлим, мәктәптә укыганда ел саен безгә грипптан прививка ясаталар иде һәм без әллә ни чирләми торган идек. Коронавируска каршы да шундый ук чара кулланырга була бит, өстәвенә бүген вакцинация узу бернинди дә проблема тудырмый. Чит илдә әнә аның өчен чират торалар, сугышалар, әле барысына да җитми. Ә без һаман каршы киләбез, прививка ясатмас өчен әллә нинди әкиятләр, легендалар уйлап чыгарып, шуңа ышанып йөрибез. Бүген вакцинациядән дә уңышлырак юл юк, башкача коронавирусны җиңеп булмый.

Дөрес, без былтыргы сыман берәр айга локдаунга китә алабыз, әмма монысыннан тиз генә рәткә килмәячәкбез шул. Көн саен коронавирус белән авыручыларның саны арта, кешеләр үлә, соңгы арада гына кемнәрне соңгы юлга озатмадык, әмма без әле дә нидер көтәбез, серле таблетканы эчәбез дә, имеш, ковид бөтенләй булмаган кебек юкка да чыгачак. Инфекцион сырхауханәдә ашыгыч ярдәм машиналары чират тора ди, чөнки авыручылар бик күп. Вирус белән чирләүчеләр һәм аларның тормышы өчен көрәшүчеләр дөньясы - аерым дөнья кебек кабул итәбез, әмма ул безнең арабызда бит, менә - инфекция үзе, ә менә - аның зыяны.

Үзизоляция вакытында шуны аңладым, әлеге вирус тән авыртуы түгел икән, ә безнең акылга кадәр узган инфекция. Югыйсә, прививка ясатып, зәхмәттән котылу юлы була торып, моннан колак кагуны ничек аңлатасы?

Рәсим Хаҗиев