Марат Садыйков: Пандемия тормышны үзгәртте

- Соңгы ун елда яңа инфекцияләр, яңа эпидемияләр гел барлыкка килеп тора. Сүз уңаеннан, кешеләрне коронавируска тикшергәндә, компьютер томгорафиясе ясаган вакытта туберкулез, үпкәдәге яман шешне башлангыч стадиясендә ачыкларга мөмкин булды. Коронавирус безнең психологияне тулысынча үзгәртте. Яңа чынбарлыкны күрсәтте. Вирусны кисәтү өчен кулларны гел юып йөрү гадәткә керде. Бу үз чиратында эчәк инфекцияләре авыруларын киметергә ярдәм итте. Үзебезгә зур сабак алдык. Ничә ел эшләп беренче тапкыр мондый хәл белән очраштык. Вируслар очрап тора анысы. Тик мондый масштабта, икътисади кризиска китергәне беренче тапкыр. Үзеңне сакларга,гаиләңә, якыннарыңа карата игътибарлы булырга кирәклегенә тагын бер кат аңладык. Барлык коллегаларыма сабырлык, түземлек телим, — диде Марат Садыйков.

Коронавирус белән авыручы табибларның эшләре җиңел түгел. Махсус тулай торакта, өйләренә кайтмый, гаиләсен күрми эшләүче хезмәткәрләр бар. Коронавируслы авырулар белән эшли торган хастаханәдә барлык саклану чаралары җитди күрелә. Ә менә коронавируслы булмаган медицина учреждениеләрендә авыру йоктыру куркынычы зуррак. Шул рәвешле Чаллыда Спид үзәктә вируслы хезмәткәрләр теркәлде. «Кызганыч, бер коллегабызны югалттык. Анда инфаркт булганы ачыкланды. Бүген коронавирус белән авырулы 400гә якын медицина хезмәткәре исәпләнә», — диде министр.