Халык тавыш бирмәсә, парклар «депутатлыкка» уза алмый

— Тавыш бирүнең максаты- торак пунктларда уңайлы шартлар тудыру гына түгел, ә бу эшчәнлеккә халыкны да җәлеп итү,- диде Татарстанның төзелеш, архитектура һәм торак-коммуналь хуҗалык министры Марат Айзатуллин Хөкүмәт йортында узган матбугат конференциясендә.
 Республикада 7 ел эчендә инде 351 парк һәм сквер төзекләндерелгән. Бу эшләргә 16,5 миллиард сум акча тотылган, шуның 5,65 миллиард сумы федераль бюджеттан күчерелгән. 
— Федераль программадан күпме финанс чыганакларына өмет итә алабыз?- дип “Шәһри Казан” газетасы исеменнән кызыксынып сорау бирдем.
— Быел республика буенча 2,29 миллиард сумга 59 парк һәм сквер төзекләндерү планлаштырылды. Федераль үзәктән безгә ел саен җәмәгатьчелек мохитен төзекләндерү өчен 1,5 миллиард сум күчерелә. Төзекләндерүгә мохтаҗ булган паркларны актив рәвештә тәкъдим итсәк, без 2023 елда да федераль бюджеттан шул ук күләмнәрдәге финанслауга өмет итә алабыз,- дип җавап бирде Марат Айзатуллин.

Төзелеш министры искәртеп узганча, Россиядә паркларны төзекләндерү беренче булып безнең республикада Татарстан Президенты Рөстәм Миңнеханов башлангычында старт алды. Бу поект соңыннан Россия күләмендәге программага әверелде.

 “Татарстан Республикасы шәһәрләрен үстерү институты” архитектура проектлары фонды департаменты җитәкчесе Наилә Зиннәтуллина сөйләгәнчә, Апаста Табарка елгасы яр буйларын, Арчада Коммуна урамы һәм Тәтештә Троицкий урамы зоналарын төзекләндерү эшләре башкарыла.
 
 Ишегалларын төзекләндерү дәвам итә

 “Безнең ишегалды” республика программасына да фатиханы Татарстан Президенты бирде. Узган ике елда республикада 2167 ишегалды яңартылган, 660 мең кешегә уңайлы мохит тудырылган. Быел 9 миллиард сумга 1200 ишегалды төзекләндерелә.

 “Безнең ишегалды” республика программасы кураторы Венера Камалова таныштырганча, биш ел эчендә барлыгы 6775 ишегалдын төзекләндерү ниятләнелә. 
— Республикада киләсе ел төзекләндерү исемлегенә тәкъдим итеп 3087 ишегалдына тавыш бирергә була. Әтнә, Әлки, Теләче, Яңа Чишмә һәм Тәтеш районнарында ишегалларын төзекләндерү эшләре инде тулысынча башкарып чыгылды. Ишегалларын төзекләндерүдә Россия предприятиеләре җитештергән чималлар кулланыла, санкцияләр эшкә киртә тудырмый,- диде Венера Камалова.
 
 Үзең белмәсәң, оныгыңа әйт

 Республиканың цифрлы үсеш министры урынбасары Илья Начвин әйткәнчә, тавыш бирү дәүләт һәм муниципаль хезмәт күрсәтүләр порталы аша башкарыла. 
— Узган ел халык актив рәвештә паркларны һәм ишегалларын төзекләндерү планына тәкъдим итеп тавыш бирде. Кемнәрдер электрон тавыш бирә белмәсә, балаларына һәм оныкларына кушсын. Электрон тавыш бирүдә ялкынланып йөрүче 70 яшьтән узган апалар да бар. Үзебезнең ишегалларыбызны төзекләндерү өчен омтылыйк,- диде Илья Начвин.