Сәрия Сабурская: “2022 ел үз дөреслегебез һәм бер-беребез өчен ничек көрәшергә кирәклеген күрсәтте”

– 2022 ел безнең алга катлаулы сораулар куйды, җентекләбрәк анализларга мәҗбүр итте, хокукларыбыз өчен көрәшергә һәм бурычларны гамәлгә ашырырга кирәклеген искә төшерде. Бу ел безгә үз ирегебез, үз дөреслегебез һәм, әлбәттә, бер-беребез өчен ничек көрәшергә кирәклеген дә күрсәтте. Бу исә безнең адреска килгән мөрәҗәгатьләр санының артуына да йогынты ясамый калмады. 2022 елда, 2021 елга караганда, мөрәҗәгатьләр саны 551гә күбрәк булды. Тагын 6 164 хәбәр Татарстанның «Халык контроле» дәүләт мәгълүмат системасына кергән мөрәҗәгатьләрне модерацияләгәндә каралуга кабул ителде. Федераль Бердәм дәүләт һәм муниципаль хезмәтләр порталының кире элемтә платформасы аша 34 846 хәбәр килеп иреште, шуларның 28 меңнән артыгы "Халык контроле" системасында үз карарын тапты, – диде ул.

Узган ел кеше хокуклары буенча вәкаләтле вәкил эшендә хәрби хезмәт һәм мобилизация мәсьәләләрен карау төп урынны алып торган.

– Татарстан Премьер-министры урынбасары Ләйлә Фазлыева белән берлектә республикада 16 яшькә кадәрге өч баласы булган күпбалалы әтиләрне мобилизацияләүдән азат итү буенча масштаблы эш башкарылды. Кабул ителгән чаралар нәтиҗәсендә 200гә якын күпбалалы әти кеше өйләренә әйләнеп кайтты. 

Мобилизацияләнгән гражданнарга түләнә торган акчага кагылышлы мәсьәләләр оператив тәртиптә тикшерелде. Мобилизацияләнгәннәрне урнаштыру пунктларында 4300дән артык граждан юридик ярдәм ала алды. Агымдагы елда да бу юнәлештәге эш дәвам итте, – диде докладчы.

Шул ук вакытта торак, хезмәт мөнәсәбәтләре, мәгариф, экология һәм гражданнар тормышының башка мөһим өлкәләренә кагылышлы хокук яклау эшчәнлегендәге активлык та кимемәгән. Ел дәвамында инвалидлар хокукларын яклауны тәэмин итүгә юнәлдерелгән чаралар үткәрелде, диде Сәрия Сабурская.
Торак мөнәсәбәтләре өлкәсенә караган мөрәҗәгатьләрнең саны да кимеми. Аларның күбесе дәүләт һәм муниципаль торак фондларында торакка хокукны һәм торак-коммуналь хуҗалык өлкәсендә идарәче оешмалар эшчәнлеге мәсьәләләрен тәэмин итүгә кагылган.

– Узган ел шулай ук торакны яшәү өчен яраксыз дип тану турындагы гаризаларны карау процедурасын уздырганда гражданнарның хокуклары бозылу очраклары да ачыкланды. Шуңа бәйле рәвештә, җирле үзидарә органнарына киләчәктә гражданнар мөрәҗәгатьләрен караганда проблемалы аспектларга игътибар итәргә тәкъдим итәбез. Кызганычка, мондый гаризаларның күпчелеге халыкның законнарны белмәве белән бәйле, шуңа да мәгълүмат-аңлату эшләрен уздыру зарур,  – диде Татарстанда Кеше хокуклары буенча вәкаләтле вәкил Сәрия Сабурская