Татарстан Президенты: Без Бәһрәйн белән хезмәттәшлеккә зур әһәмият бирәбез

«Россия Федерациясе Бәһрәйн белән үзара багланышка зур әһәмият бирә. Безнең ил Мәмләкәтне Якын көнчыгыш төбәгендә мөһим сәүдә-икътисадый һәм инвестицион партнер буларак карый», - дип мөрәҗәгать итте ТР Президенты шәехкә.

Рөстәм Миңнеханов билгеләгәнчә, Татарстан, үз чиратында, Россия-Бәһрәйн мөнәсәбәтләре кысаларында Мәмләкәт белән хезмәттәшлек үсешенә өлеш кертергә омтыла.

«Безнең республика ислам дөньясы илләре белән актив элемтәдә тора. Ислам Хезмәттәшлеге Оешмасы, Ислам үсеш банкы, ИХО яшьләр форумы кебек абруйлы халыкара институтлар белән хезмәттәшлек җайга салынды. «Россия – Ислам дөньясы» стратегик караш төркеме линиясе буенча зур эш алып барыла, мин аны Россия Федерациясе Президенты Владимир Путин кушуы буенча җитәклим», - дип билгеләп үтте Рөстәм Миңнеханов.

Стратегик караш төркеме рәисе шәехкә төркем кысаларында актив эше өчен рәхмәт әйтте.

Очрашу вакытында хезмәттәшлек перспективалары турында да фикер алыштылар. Татарстан Республикасы Президенты сүзләренчә, республиканың сәнәгать предприятиеләре Бәһрәйннең номенклатура төрлелеге буенча кызыксынуын канәгатьләндерә ала. Рөстәм Миңнеханов Бәһрәйн компаниясен Татарстанда инвестицион проектларда катнашырга чакырды.

«Бәһрәйн – Якын Көнчыгышның финанс үзәкләренең берсе. Татарстан ислам банкингы һәм финанслау принципларын кертү буенча Россиядә сынау төбәге булып тора», - дип белдерде Татарстан Президенты.

Үз чиратында шәех Рөстәм Миңнехановка очрашуда катнашучыларны тәкъдим итте, ул Ислам эшләре буенча советның барлык вәкилләрен ТР Президенты белән әңгәмәгә чакырды. «Шәхсән үземнән һәм безнең советтан сезгә әлеге очрашу өчен рәхмәт белдерәсем килә», - дип мөрәҗәгать итте шәех.

«Без шулай ук мөнәсәбәтләребезне үстерергә омтылабыз. Дини линиягә килгәндә, безнең казанышларыбыз бар, бигрәк тә «Россия-ислам дөньясы» кысаларында. Бу төркемнең ислам дөньясында зур роле бар, - дип ассызыклады Бәһрәйнның Ислам эшләре буенча югары совет рәисе. - Россиядә мөселман кардәшләребезгә булган мөнәсәбәт өчен дә рәхмәт белдерәсебез килә».

Шәех билгеләгәнчә, икътисадый линия буенча да хезмәттәшлекне ныгыту эше дәвам итәчәк.

ТР Президенты Матбугат хезмәте.