Беренче мәхәббәт әллә нишләтә...

Адәм баласы үзенең беренче мәхәббәте белән кавыша алмаса, аны гомер буе күңел түрендә саклый. Комедия бер-берсен сөйгән Алия белән Маратның кавышырга ниятләп йөрүләреннән башлана. Алар әти-әниләрен таныштырырга дип кафега чакыралар. Шунда көтелмәгән хәл була: кызның әнисе Камилә егетнең әтисе Булатның беренче мәхәббәте икән. Гадәти булмаган образ Мәхәббәт фәрештәсенең күк­ләрдән кушылган вазифасы - геройларны бәхетле итү, чөнки ул һәркемнең язмышы күкләрдә язылуын яхшы белә.

Булат Камиләне күрүенә шатланып туймый. Кызның әтисе Радик әлеге гаилә белән туганлашуга каршы, әмма яшьләр барыбер үз бәхетләре өчен көрәшәләр, беренче мәхәббәтләрен кулдан ычкындырмыйлар, әти кешенең ризалыгыннан башка гына кавышалар.
Баш рольләрдә уйнаган Айсылу Мөсәллимова белән Салават Хәбибуллин - узган ел гына театр училищесын тәмамлаган яшьләр.
Аида ролендәге Татарстанның халык артисты Җәмилә Әсфәндия­рованы, сәхнәгә чыгуга ук, зал алкышлап каршылады. Шәһәрдә яшәсә дә, авыл хатыны холкын югалтмаган Аида ролен, аның кичерешләрен үз йөрәге аша үткәреп бик оста җиткерде. Анда бернинди ясалмалылык юк. Әнә шулай күңелендәге хис-кичерешләр артистның роле белән туры килгәндә генә тамашачыга якын образ тудырып буладыр ул. Татарстанның атказанган артисты Миләүшә Нәҗмиева - характерлы образлар тудыручы актер. Камилә Әхәтовна роле аңа килешеп тора. Баласын бәхетле итү өчен, үзенең ирен дә өйләнешүләренә каршы килмәскә күндерә. Шундый изге күңелле ананы яратмый мөмкин түгел. Харис Хөснетдинов белән Алмаз Фәтхуллин образлары - бер-берсенә кап­ма-каршы. Хариска уен-көлкеле, гади, беркатлы ир-ат роле төс. Бу аның үз холкы белән тәңгәл килә, актер табигыйлеге, ролен җиренә җиткереп башкаруы белән истә кала. Алмаз Фәтхуллин үз роле белән җитди, башкалардан өстен булып кыланган ир-ат ролен күз алдына китереп бастырды. Радик Маратович башта тамашачыда нәфрәт уятса, соңыннан аны тамашачы үз итте.
Спектакльне караганда һәркем үзенең тәүге мәхәббәтләрен искә төшереп утыргандыр. Ә яшьләргә Алия белән Маратка карап үрнәк алырга кирәктер.