100 сыерчык оясыннан – уенчыкларга

Тумышы белән ул Курган якларыннан. Әтисе – мәктәп директоры – агач эшен нык яраткан. Рөстәм дә кечкенәдән әтисе янында мәш килеп, агач эшкәртү серләренә өйрәнгән. Радиоаппарат төзелеше белгечлеген үзләштерсә дә, Татарстанга кайткач, агач эше белән генә шөгыльләнә башлаган. Булачак хатыны белән танышуы да киноларда гына була торгандыр. Туганы Татарстан кызына өйләнгәннән соң, кунакка кайткан егет чибәр Әтнә кызы белән таныша, икенче көнне очрашалар, өченче көнгә никах та укыталар. Менә инде 15 елга якын алар бергә. Өч бала тәрбияләп үстерәләр.

Иң беренче агач эшләнмәсен Рөстәм өченче сыйныфта укыган чагында ясый: агач мылтык була ул. Кемдер аның осталыгына соклана, ә әтисе мылтык өчен колагын да бора. Аннары егет сыерчык оялары ясауга күчә. Беренче акча китергән, агач эше белән җитди шөгыльләнергә этәргән эше дә шул сыерчык оясы.
– Баҗай киңәше белән, ясаган сыерчык оясын «Авито» сайтына сатарга куйган идем. Шалтыраткан клиентка бер генә түгел, 100 сыерчык оясы кирәк булып чыкты. Алдан ук акчасын да биреп куйды. Кулда бер пычкы гына бар иде ул чакта. Станоклар сатып алдым, 100 сыерчык оясын өлгерттек. Шуннан соң башка тәкъдимнәр дә килә башлады, – ди Рөстәм.

Баштарак танышлары киңәше буенча бер генә төрле юнәлештә эшләп караган, әмма күңеле иҗади төрлелеккә тартыла.
Агач белән эшләгәндә иң беренче чиратта материалга һәм клиентның теләген истә тотарга кирәк, дип саный егет.

– Кайбер клиентлар сызымнарга кадәр әзерләп бирәләр, барысын да рәсемдәгечә ясыйсың да кебек, ә ул канәгать калмаска мөмкин, шуңа да аның күзләреннән үк нәрсә теләгәнен аңлый белергә кирәк. Материалга килгәндә, бездә сувенир өчен агач табуы авыррак. 1976 еллардагы кырау агачларга зыян китергән. Шуңа да, әйтик, имән бик матур булса да, чатнаган, ярылган урыннары күп. Сувенирлар өчен экзотик агачлар уңышлы кулланыла. Аларның күбесен шәһәр кибетләреннән сайлап алам, ә наратны Мари Элдан кайтартам. Вак эшләнмәләр ясагач, бер сатып алган материал ике-өч елга җитә, – ди оста.

Универсиада вакытында үзебездә сувенир җитештерүчеләргә дәүләт грантлар биргән, Рөстәм Якупов та бу мөмкинлектән файдаланып калган, дәүләт акчасына лазерлы станок алган. Хәзер Рөстәм яңа төр эшләнмәләргә керешкән, үзеннән-үзе ачыла торган шкатулкалар ясый башлаган.