Альберт Нәфигыйн Татарстан Президентының ярдәмчесе итеп билгеләнде

Бүгеннән Татарстан Президентының ярдәмчесе вазыйфаларын Альберт Нәфигыйн башкарачак. Аны Президент ярдәмчесе итеп билгеләү турындагы карарны Рөстәм Миңнеханов бүген, 4 мартта, имзалады. Элеккеге Президент ярдәмчесе Айрат Хәйруллин Әлмәт шәһәре Башкарма комитеты җитәкчесе вазыйфаларын вакытлыча башкаручы итеп билгеләнде.

Моңа кадәр Альберт Нәфигыйн Татарстан Республикасы Министрлар Кабинеты Аппаратының икътисад, финанс һәм дәүләт милке белән идарә итү Идарәсе җитәкчесе иде. Ул 1998 елда Казан бизнес һәм идарә институтын "менеджмент" белгечлеге буенча тәмамлаган.