Алинә Заһитованың әбисе Надирә Сафуанова: «Алинә кайтуга дип токмач басып шулпа куйдым»

- Алинәнең кайтуына токмач басып, тавык, сыер итеннән шулпа куйдым. Ул бала ярышларда бер кашык та аш капмагандыр инде. Ә үзебезнең татар ашы бик кирәк ул организмга. Табынга әллә ни әзерләмәдем. Ят ризыкларны Олимпиадада да күп ашагандыр инде ул, - дип сөйләде безгә әбисе аш бүлмәсендә кайнаганда.
Надирә ханым үзе дә кече оныгы Сабина белән бүген генә Ижаудан килгән әле.

- Алинә Олимпиадага киткәч, мин Ижауга кайтым. Ул минем туган ягым бит. Туганнарыбыз, дусларым белән очраштым. Әле бүген генә Сабина белән поездан төштек. Әтиләре Илназ каршы алды, - ди Надирә ханым.

Әбисе оныгының Олимпиададагы чыгышын карамаган да икән.
- Мин аның бер генә чыгышын да карамыйм. Булдыра алмыйм! Ул бозга чыкканда мин намаз укып аңа теләк теләп тордым, Ходайдан уңышлы чыгыш ясавын сорадым. Соңыннан әтисе шалтыратып: “Алинә җиңде!” - диде. Без аның җиңүенә әле дә ышанып бетә алмыйбыз. Олимпиада вакытында Алинә белән аралашмадык диярлек. Үзем шалтыратмадым, аптыратмадым.
\Вакытлары булганда үзләре элемтәгә чыктылар, - ди әбисе.
Оныгының “Хатико” киносындагы кебек акита-ину токымлы эт асрарга теләвен әбисе матбугаттан укып кына белгән.

- Минем янда эт турында сөйләшкәне юк иде. Әти-әнисенә әйткән булгандыр. Мин барыбер аңа каршы булыр идем. Татар кешесенә өйдә эт асрау килешми бит инде, - ди ул.
Әбисе Алинәгә татар халкының гореф-гадәтләрен сеңдереп калдырырга тырыша. Алар икәү бергә мәчеткә дә йөриләр икән әле.

- Минем өчен иң мөһиме - Алинәнең кешелекле, гадел, киң күңелле булып үсүе, - ди Алинәгә Олимпия чемпионы булырга ярдәм иткән әбисе Надирә  Сафуанова.