Алма белән гөмбә сатканга да салым түлисеме?

Шушы көннәрдә гөмбә сезонын ачып җибәрүчеләр дә бар. Ә инде үзеннән, балаларыннан, туган-тумачасыннан арткан табигать сый-нигъмәтләрен сатып та җибәрәләр.  

Шуңа күрә үзмәшгульләргә салым түләтү турындагы яңалыкны алар да борчылып кабул итте.

- Быел урманнан җиләк җыеп, унбиш мең сум акча эшләдек. Бакчабыз зур. Анда барлык җиләк-җимеш тә үсә. Бакча җиләгенең, чиянең уңышы яхшы булды. Викторияны авыл кешеләре килеп алды. Аларга бер килограммын 250 сумнан саттык. Карлыган һәм чиянең бер килограммын 200 сумнан тәкъдим иттек. Алма да күп, ләкин аны сатмыйбыз инде. Алма бөтен кешедә дә бар бит. Үзләренекен кая куярга белми аптыраучылар да бар. Менә тиздән гөмбә сезоны ачыла. Күп булса, үзебезгә әзерләп бетергәч, аны да сатырга исәп бар, - диде Азнакай районыннан Гөлсем Хәбибуллина.  

Ул үзмәшгульләргә салына торган салым турында ишетеп белә. “Безгә үк килеп җитмәсләр әле” дисә дә, күңелендә шик барлыгын да яшерми.

- Без әллә нинди зур акчалар эшләмибез бит инде. Үз хезмәтебез белән җыйганны, үстергәнне, үзебездән артканны гына сатабыз. Шуңа да салым салмасыннар иде инде, - ди ул.

Ә менә Кама Тамагы районында яшәүче укучыларыбыз чыннан да борчуга төшкән икән. Аларны бакчаларындагы алмагачка да салым салырга мөмкиннәр икән имеш-мимешләр куркыта.    
Әлеге мәсьәләгә ачыклык кертергә теләп, без Татарстан Республикасы Дәүләт Советының Экология, табигатьтән файдалану, агросәнәгать һәм азык-төлек сәясәте комитеты рәисе Таһир Һадиевка чыктык. Аның аңлатуынча, салым турындагы закон әлегә башлангыч этабында гына.

- Шәхси хуҗалыгында берничә сыер тоткан, болын-кырлардан, урманнан җиләк, гөмбә җыеп саткан, бакчасындагы җиләк-җимешен саткан кешеләр салым түләргә тиеш түгел. Билгеле инде, әгәр кеше күпләп мал асрый, аның зур гектарда җирләре бар икән, ул шәхси хуҗалык булып исәпләнелә алмый. Алар юридик зат булып эш ача да, салым түли, - ди аңлатты Таһир Һадиев.

Аның сүзләрен эшмәкәрләр хокукларын яклау буенча вәкаләтле вәкил аппараты матбугат хезмәте дә хуплады.   

- Сез әйткән эшчәнлекләр үзмәшгульлек статусына карамый. Бакчачылар һәм җиләк-җимеш, гөмбә җыеп сатучылар тыныч булсыннар, салым турындагы закон аларга карамый һәм алардан салым түләтмиячәкләр, - диде Альбина.  

Гөлнара Зиннәтуллина фотосы