#Төп тема 05 март 2020, 13:18

Ана капиталы— аталарга да

05 март 2020, 13:18

Ана капиталын алуда яңалыклар бар. Яшь гаиләләргә матди ярдәм буларак бирелә торган ана капиталын хәзер әтиләр дә алу хокукына ия булачак. Моның өчен ата кешенең бердәнбер уллыкка (кызлыкка) алынучы итеп исәпләнүе шарт.

Скопировать ссылку

Билгеле булганча, Владимир Путинның гыйнвар аендагы еллык юлламасыннан соң ана капиталын бирү тәртипләрендә үзгәрешләр кертелгән иде. Хәзер бу программадан икенче балалары туганнар гына түгел, ә тәүге тапкыр әти-әни булучылар яисә гаиләләренә бала алучылар да файдалана ала.

Ана капиталын алуга гаризаларны карау вакыты да биш көн эчендә башкарылачак. Моңа кадәр ул 15 көн булган. Ана капиталыннан файдалану өчен язылган гаризаларны да күп дигәндә ун эш көне эчендә карарга вәгъдә итәләр. Элегрәк бу бер ай дәвамында эшләнелгән. Дөрес, бу рәвешле эшләү әле 2021 елда гына гамәлгә керә.

Гаиләдә игезәк балалар туа икән, ул очракта, дәүләт 616 мең күләмендә акча бирәчәк. Гәрчә, нарасыйлар әле гаиләдә тәүге бала булып тусалар да.

Шунысы да сөендерә, ана капиталы ел саен индексацияләнәчәк.

Быел, фаразлар буенча, якынча 40 меңләп бала тууы көтелә. Шул нисбәттән, ана капиталы программасы кысаларында, гаиләләргә 13 млрд сум акча биреләчәк. 2019 елда бу сумма 9 млрд сум булган, дип белдерде Россия Пенсия фондының ТР буенча бүлегенең социаль түләүләр бүлеге башлыгы Гөлсинә Сабирова.

Лилия ЛОКМАНОВА

Кызыклы яңалыкларны күзәтеп бару өчен безнең МАХ каналына кушылыгыз.

#Ана капиталы