Аномаль эсселек атна ахырына чигенәчәк

Гомумән алганда, августта һава торышы климатик нормадан 1,5 градуска югарырак булачак, явым-төшемнәр исә нормадан азрак булмагае, дип яза "Татар-информ".

- Татарстанда соңгы елларда кышкы һәм җәйге температура күтәрелә бара. Шулай ук куркыныч гидрометеорологик күренешләрнең артуы күзәтелә, ди Татарстанның Гидрометеорология һәм әйләнә-тирә мохитне күзәтү идарәсе гидрометеорология үзәге башлыгы Феликс Гоголь. - Безнең идарәдә климатның үзгәреше буенча тикшеренүләр алып барыла. Күпьеллык күзәтүләргә карап кайбер нәтиҗәләр дә ясадык. Күп айларның температурасы һәм уртача еллык температура күтәрелә бара. Өстәвенә, кайвакытта - шактый сизелерлек. Соңгы елларда без кышкы температура белән бергә җәйгесенең дә күтәрелә баруын күрәбез. Татарстанда хәзер экстремаль климат.

Республиканың көньяк-көнчыгышындагы районнарда корылык күзәтелә. Әмма рәсми теркәлгән корылык уңыш җыюга йогынты ясамый. Хәзерге вакытта республикада уңыш җыю ярыйсы ук яхшы дәрәҗәдә алып барыла, гектарыннан 30 центнерлап чыга. Сабан уңышына карата да синоптиклар пессимистик сценарий күрми.

- Уңдырышлылык буенча быелгы күрсәткечләр узган елдагысыннан югарырак, - ди Феликс Гоголь.

Сүз уңаеннан: эссе һава торышы гипертония һәм йөрәк-кан тамырлары авыруларыннан интегүчеләрнең сәламәтлегенә тискәре йогынты ясый. Татарстанда инсульт буенча ашыгыч ярдәм сорап мөрәҗәгать итүчеләр саны арткан.

^{_{Илдар Мөхәммәтҗанов фотосы}}