«Бер генә юнәлеш буенча да тизлекне киметү – халык өметен акламау дигән сүз, моңа юл куярга ярамый»

Казанның "Корстон" комплексында "Бердәм Россия" Бөтенроссия сәяси партиясе Татарстан төбәк бүлегенең XXV конференциясе булды.

Конференциягә "Бердәм Россия" партиясенең 45 җирле бүлегеннән 300дән артык делегат җыелды. Аның эшендә Татарстан Президенты Рөстәм Миңнеханов, Татарстан Премьер-министры Идар Халиков, республика Хөкүмәте әгъзалары, "Бердәм Россиянең" Яшьләр гвардиясе" һәм иҗтимагый оешмалар вәкилләре катнаша.

"Партиянең сайлау алды платформасына анык эш программасы салынган. Съезд документлары "Бердәм Россия"нең ил киләчәге өчен аеруча зур җаваплылыгы белән сугарылган. Кабул ителгән карарларны үтәү өчен җитди эшләр көтә", - дип белдерде Рөстәм Миңнеханов, чарада катнашучылар алдында чыгыш ясап.

"Төбәк исемлегенең башында минем кандидатурамны күрсәтүгә партиянең зур ышанычы итеп карыйм. Һичшиксез, бу республикабызда без башкарган эшләрне бәяләү дә", - диде ул.

Дәүләт Думасына сайлауларга "Бердәм Россия"нең Татарстан блогы бер команда булып бара, дип саный республика лидеры. Аның әйтүенчә, партия исемлегенә керүчеләр дә, бер мандатлы округлар буенча сайланырга тиешле кешеләр дә Татарстанга тугрылыкларын эшләре белән раслаганнар.

"Без кабул иткән карарлар почмагының үзәгендә теләк һәм өметләре, ихтыяҗ һәм омтылышлары белән кеше тора. Партиянең бурычы - Татарстан һәм Россияә яшәү һәм бизнес белән шөгыльләнү өчен уңай шартлар тудыру", - дип белдерде Рөстәм Миңнеханов.

Уңышлы үсеш нигезе итеп Татарстан Президенты икътисадны атый. Хәтта кимү шартларында да республика күп юнәлешләр: сәнәгать, авыл хуҗалыгы, төзелеш, инновацияләр буенча уңай динамиканы саклап кала.

"Татарстанның инвестицион җәлеп итүчәнлек индексы буенча РФдә әйдәп баручы позицияләрне биләвен билгеләп үтү мөһим. Без дөньяның 140тан артык иле белән эшлекле мөнәсәбәттә торабыз. Узган ел чит ил инвестицияләре өлеше бер ярым тапкыр артты. Тышкы сәүдә әйләнеше 14 млрд доллар тәшкил итте. Республика инновацион үсештә Россия буенча лидер санала. Иннополис һәм "Алабуга" махсус икътисади зонасы белән кызыксыну арта", - дип хәбәр итте Р.Миңнеханов.

Теләсә кайсы субъектның икътисади үсеш компоненты булып социаль өлкә санала. "Татарстан тотрыклы үсеш кичерсен өчен барлык социаль йөкләмәләрне саклап калу мөһим. Бездә 30дан артык программа бар. Аларның күбесе безнең республикада гына тормышка ашырыла Социаль ипотека үстерелә, авыл клублары, спорт объектлары, ФАПлар, ветеринар пунктлар төзелә, эчәргә яраклы су, фермер һәм крестьян хуҗалыкларын үстерү проблемасы хәл ителә, халыкның табигый үсеше дә әһәмитяле күрсәткеч санала", - дип билгеләп үтте республика лидеры.

Аның фикеренчә, бер генә юнәлеш буенча да тизлекне киметү - халык өметен акламау дигән сүз. Моңа юл куярга ярамый диде республика Президенты.

"Бүген татарстанлыларга үсеш өчен кирәкле бөтен әйбер: уйланылган программа, әзерлекле кадрлар, бердәмлек һәм ихтыяр көче бар дияргә нигез бар", - дип билгеләп үтте Рөстәм Миңнеханов.

"Һәм иң мөһиме - халык белән даими элемтә булу, - диде ул. - Һәркемгә республикада тормышка ашырылучы үсеш программаларында катнашы барлыкны аңлау һәм тою мөмкинлеген бирү зарур".

"Безнең һәркайсыбыз өчен тавыш биреп, кешеләр, иң беренче чиратта, без бергә ирешкән реаль нәтиҗәләр өчен тавыш бирә", - дип мөрәҗәгать итте Татарстан Президенты партиядәшләренә.

Искәртәбез: 2,5 айдан соң ил парламентының яңа составын сайларга туры киләчәк.

tatar-inform.ru