Чакрым саен багана...

Мәгълүм җырдагы кебек «чакрым саен багана» утыртылса, бик ансатка туры килер иде. Мэриядә узган киңәшмәдә «Казгорсвет» муниципаль унитар предприятиесе директоры Рөстәм Абделхаков: «Шәһәр эчендә тышкы яктырту баганалары нормативлар буенча һәр 30-35 метр саен торырга тиеш. Фучик урамында баганалар арасы 45-50 метр», - дип әйтте. Шәһәрдәге электр баганаларына өстәвенә трамвай һәм троллейбус линияләре чыбыклары да эленгән. Белгәнебезчә, тузган тимер-бетон баганалар, авырлыкка һәм тартылуларга түзә алмыйча, ава башлады. Шөкер, үлем-китем булмады. «Ершов урамында - 52, Девятаев урамында - 24, Сыртланова урамында - 6 һәм Пушкин урамында 2 багана утыртылды инде. Моннан тыш, тышкы яктырту челтәрен агымдагы төзекләндерү кысаларында, 30 тузган багана яңага алмаштырылды», - диде Рөстәм Абделхаков.
Эшләр норматив таләпләрне үтәп башкарыла, ә бу чыгымнар арта дигән сүз. Фучик урамында, мәсәлән, элек 44 багана торса, хәзер аларның саны 71не тәшкил итәчәк. Көн саен уртача 10-15 багана алмаштырыла. Эшләр юлдан читтә үткәрелгәнлектән, транспорт хәрәкәтенә кыенлык тудырылмый.
Казан урамнарындагы тышкы яктырту баганаларын яңаларга алмаштыру май ае урталарында башланган иде. Мэр Илсур Метшин: «Тузган баганаларны алмаштыру эшләрен август ахырына тәмамлау зарур. Һава шартлары йогынтысында көчәнеш арта, шунлыктан, көзге-кышкы чорга электр челтәренә бәйле мәсьәләләр чишелеш тапкан булырга тиеш», - дип күрсәтмә бирде.