Җиңелү бер хәл, тынычлык мөһимрәк

Мәгълүм булганча, быелның май аендагы очрашу вакытында «Спартак» клубы җанатарлары Казанның Бауман урамындагы биналарга төрле рәсемнәр ябыштырып, буяулар белән сызып-бозып, тышкы корылмаларны ватып киткәннәр иде. Шушы хәлдән соң, башкала мэры Илсур Метшинның шәһәр хакимиятендә узган киңәшмәдә полиция хезмәткәрләре адресына кискен тәнкыйть сүзләре әйткәнлеге хәтердә.
- Бауман урамында бала арбасы белән аналар, балалы гаиләләр, туристлар тыныч кына ял итеп йөргән бер мәлдә, «Спартак» җанатарлары шушындый мәхшәр тудырды. Мондый тәртипсезлек зур колач та алырга мөмкин бит, - дип кисәткән иде Илсур Метшин.
Казан шәһәре буенча эчке эшләр идарәсе җитәкчесе Валерий Красильников хәбәр иткәнчә, спорт клубларының 1 августтагы очрашуында җәмәгать тәртибен 1,5 мең полиция хезмәткәре саклаган. Күрше‑тирә республикалардан һәм өлкәләрдән дә ОМОН отрядлары ярдәмгә килгән. Хәбәрләргә караганда, Казанга «Спартак» клубының 7 меңгә якын җанатары җыелды. Меңьеллык, 1 май, Тукай мәйданнарында, Бауман урамында аларны һәр адымда очратырга була иде. «Спартак» җанатарларының телефоннан: «Теге урамда да, монда да ОМОН», - дип, үзара чыш‑пыш сөйләшүләре колакка чалынды, май аендагы кебек «марш» оештырырга исәпләре дә булган аларның, күрәсең.
- «Спартак» клубының 134 җанатары җәмәгать тәртибен бозганы өчен тоткарланды, 50сенә беркетмә тутырылды, «Спартак»ның 40 җанатары кулга алынды. Массакүләм тәртипсезлеккә юл куелмады. «Спартак» клубы җанатарлары арасында фашист свастикасын күтәрүчеләр булуы борчу тудыра, - диде Валерий Красильников.
Шәһәр башкарма комитеты җитәкчесе Денис Калинкин әлеге мәсьәләгә карата мөнәсәбәтен белдереп:
- Казан - кунакчыл шәһәр. Рәхим итеп, мәдәни чараларны да, спорт уеннарын да карарга килсеннәр! Әмма Казанда эчеп-исереп котырынырга, җәмәгать тәртибен бозарга юл куелмаячак, - диде.

Алдагы уеннар:
9 август, 20.00 сәг. «Терек» (Грозный) - «Рубин»
13 август, 20.00 сәг. «Арсенал» (Тула) - «Рубин»
17 август, 18.30 сәг. «Казан-Арена». «Рубин» - «Локомотив» (Мәскәү)