Үлемең судан булса...

Татарстан буенча Гадәттән тыш хәлләр министрлыгы хәбәрләренә караганда, бер атнада гына да сулыклардан 9 кешенең үле гәүдәсе чыгарылган, тагын 2 ир-атны су төбеннән эзләү бара. Соңгы көннәрдә генә Урта Кабан күлендә 30 яшьлек ир батты. Дәрвишләр бистәсе тирәсендә Казансу елгасында 24 яшьлек кызның, ә Яшел Үзән районындагы Светлое күлендә 14 яшьлек үсмер егетнең гомере өзелде. 12 июньдә Зур Дәрвишләр бистәсендә 15 яшьлек яшүсмер, Лаеш районындагы «Ял» базасы янәшәсендә 18 яшьлек егет үлемнәрен суда тапты.