#Төп тема 18 февраль 2016, 06:27

Президент алтын урталыкны билгеләде

18 февраль 2016, 06:27

Кичә узган елга нәтиҗә ясаучы коллегия утырышларының соңгысы узды. Авыл хуҗалыгы һәм азык-төлек министрлыгы моннан дүрт-биш ел элек коллегияне берәр алдынгы районда үткәрә иде. Авыл хуҗалыгы тармагыннан бик ерак булган министрлар, җитәкчеләр дә ферма исен иснәп, сыер, бозау күреп кайталар иде. Соңгы елларда алар бу бәхеттән «мәхрүм». Утырыш соңгы елларда...

Скопировать ссылку

Авыл хуҗалыгы җитештерү комплексында 2015 елгы табыш 85,3 млрд сум булган, узган ел белән чагыштырганда, үсеш 114 процент. Керем - 11 млрд сум, бу узган елдан 1,2 млрд сумга артыграк. Рентабельлек исә - 16,3 процент. Татарстан буенча 1 га сөрүлек җиренә 26 мең сум керем туры килә. Авыл хуҗалыгы тармагында эшләүчеләрнең уртача хезмәт хакы - 17,2 мең сум. Һәр тармактагы күрсәткечләр белән таныштырганнан соң, премьер-министр урынбасары - авыл хуҗалыгы һәм азык-төлек министры Марат Әхмәтов районнар буенча саннарның бик төрле булуына басым ясады.

- Элек булса, моның өчен район башлыклары партбилетларын салырга тиеш булырлар иде, - диде ул.

Иң-иңнәр рәтендә - Әтнә, Балтач, Тукай, Актаныш, Саба районнары. Барлык күрсәткечләр буенча да иң соңгы урында - Чирмешән районы, аннан аз гына өстәрәк Менделеевск һәм Әлмәт районнары. Балтач районының «Кызыл юл» хуҗалыгында бер сыер уртача 28 литр сөт бирә. Рекордсмен сыерның көнлек савымы - 48 литр. Шул ук вакытта кайбер районнарда уртача савым 5 литрдан да артмый. Рөстәм Миңнеханов үзенең чыгышында бүгенге коллегиядә ике мөһим сорауны хәл итәсе бар дип белдерде һәм четерекле мәсьәләләрне чишү буенча мастер-класс күрсәтте дияргә дә була.

- Альберт Кашафович, язгы чәчү чорында ягулыкның бәясе 24 сум булачакмы, 26 суммы? - дип «ТАИФ»ның генераль директоры Альберт Шиһабетдиновны бастырды да җавап биреп бетергәнче: «Алтын урталык 25 сум булсын», - дип, бәяне билгеләп тә куйды. Аннан соң, уенын-чынын бергә кушып:
- Әле ярый 25 сум булса да түлиләр, түләмәсәләр, ни эшләтер идең, - дип тә өстәде.

Әлбәттә инде, бөтен зал белән бергә рәхмәт әйтеп, кул чаптырырга да онытмады. Икенче мөрәҗәгать банкирларга булды.

- Сезнең янга бармый кая барабыз, бер уртак фикер табып эшлик, - дип, анысын да көйләп куйды.

Президент үз чыгышында авыл хуҗалыгы ризыгы җитештерүчеләрне халыкны сыйфатлы азык-төлек белән тәэмин итәргә өндәде.

- Начар ризык ашатабыз да, аннан соң дәвалыйбыз. Син дә пальма мае кушасыңмы? - дип, «Просто молоко» җәмгыяте җитәкчесе Марат Моратовны да урыныннан кузгатты.

Моратов исә: «Без үзебез майның сыйфатын тикшерә торган приборлар урнаштырдык», - дип җавап бирде. «Ул приборларны һәр сәүдә үзәгенә куйсак та, артыгы булмас», - диде Президент, аңа каршы.

Ризык бәяләре буенча казанлылар оттырмый икән, миллион халыклы шәһәрләр арасында төп ризыкларның түбән бәясе буенча Казан һәрвакыт 1-3 нче урыннарны алып килә диделәр коллегиядә.

Кызыклы яңалыкларны күзәтеп бару өчен безнең МАХ каналына кушылыгыз.

#250