Рөстәм Миңнеханов: «Бу балалар өчен генә түгел, ә өлкәннәр өчен дә кызыклы урын»

Ул- Россиядәге иң зур динопарк. Әлеге тантанада социаль челтәрләрдәгеләргә таныш булган Мәскәү укучысы Степан Савельев та бар иде. Аны Татарстан Президенты әлеге мавыктыргыч парк ачылышына махсус чакырган. Степанның динозаврлар белән мавыгуыннан сыйныфташлары көлгәннән соң, малайның әнисе аңа ярдәм итәргә теләп интернеттагыларга мөрәҗәгать иткән иде. Бу хәлгә Татарстан Президенты да битараф калмады.

Соңрак Степан журналистларга биргән әңгәмәсендә: "Миңа бик ошады. Башка шәһәрләрдә парклар кечерәк, тир да беркайда да юк", - диде.
Татарстан Президенты яңа паркны бик ошатып, Казанда палеонтология мәктәбен үстерү кирәклеге турындагы фикерен әйтте.

"Әлегә парк вакытлы, аны даими эшли торган итсәк яхшы булыр иде. Бу хакта уйларбыз. Мин Киров өлкәсендәге хезмәттәшләребезгә рәхмәтлемен. Миңа Киров өлкәсе губернаторы Никита Белых шалтыратып тәкъдим итте, алар республикада яшәүчеләр һәм кунаклар өчен зур бүләк ясадылар. Бу балалар өчен генә түгел, ә өлкәннәр өчен дә кызыклы урын", - диде Президент.

"Казан-Арена" стадионы каршындагы мәйданчыкта урнашкан әлеге парк 6500 квадрат метр мәйданны били.

Паркка керү билеты - 500 сум. Бер олы кеше 14 яшькә кадәрге ике баланы бушка алып керә ала.

Динозаврлар паркы 15 октябрьгә кадәр эшләячәк.

ФОТОРЕПОРТАЖ