Татарстан Президенты Җәлил һәйкәленә чәчәкләр салды һәм әфганчылар белән очрашты

Бу хакта Татарстан Президентының матбугат хезмәте хәбәр итә.

Истәлекле вакыйгаларга бай көннең иртәсендә рөстәм Миңнеханов Җәлил һәм җәлилчеләр истәлегенә куелган һәйкәл янында булды һәм шагыйрь һәйкәленә чәчәкләр салды. Билгеле булганча, бүген каһарман-шагыйрь Муса Җәлилнең туган көне.

Соңрак Ватаннан читтә хезмәт бурычын үтәгән россиялеләрне искә алу көне уңаеннан Рөстәм Миңнеханов Әфганстан Республикасындагы хәрби хәрәкәтләр ветераннарына Татарстан Республикасы дәүләт бүләкләре тапшырды. Тантана Казан Кремлендә узды.

«Бүген безнең илдә Ватаннан читтә хезмәт бурычын үтәгән россиялеләрне искә алу көне билгеләп үтелә. Бу көнне без төрле елларда хезмәт бурычы  буенча ерак һәм якын чит илләрдә халыкара террорчылыкка каршы торганнарны искә алабыз, - диде Рөстәм Миңнеханов. – Әфган сугышы илебез тарихында хәрби батырлык, интернационалист сугышчыларның патриотизм символы булып мәңгегә калачак. Сез – Бөек Ватан сугышы елларында дошманны җиңгән ата-бабаларыбызның батырлыгын лаеклы дәвам итүчеләр, быел без Бөек Ватан сугышында Җиңүнең 75 еллыгын бәйрәм итәчәкбез».

«Әфган сугышында Татарстаннан 11,5 меңнән артык кеше катнашкан, 300ләп кеше һәлак булган, - диде Рөстәм Миңнеханов. – Без намус белән, кайчак гомере бәрабәренә үзенең Ватан алдындагы офицерлык һәм солдат бурычын үтәгәнннәр алдында бурычлыбыз».