Татарстанда җылылык 20 сентябрьдән соң бирелә

Ә менә Казанның ун балалар бакчасына җылылык инде җибәрелгән дә, аларның җитәкчеләре җылылык бирүне вакытыннан алда сорап заявка биргән.

Татарстан Республикасы Министрлар Кабинетында узган брифингта Татарстанның төзелеш, архитектура һәм торак-коммуналь хуҗалык министрының беренче урынбасары Алексей Фролов шулай дип белдерде.
Аның сүзләренчә, 15 сентябрьгә, һава температурасы нинди булуга карамастан, җылылык җибәрүгә барысы да әзер булырга тиеш.

Хәзерге вакытта башкаланың Сәйдәшев һәм Красный Пожарник урамнарында ике җылылык үткәргечне алмаштыру эшләре дәвам итә. Бу эшләрне төгәлләү өчен республика бюджетыннан 33,8 миллион сум бүлеп бирелгән. Алдагы ун көндә ремонтны төгәлләргә җыеналар.

Коммуналь инфраструктура объектларына килгәндә, алар уртача 98,3 процентка әзер булса, 14 сентябрьгә булган мәгълүматларга караганда, торак фонды 39 муниципаль берәмлектә җылылык җибәрүгә әзер. Җирле башкарма комитетлары тарафыннан Аксубай, Актаныш, Арча, Зәй, Минзәлә, Түбән Кама һәм Тукай районнарында ягу сезонын алдан башлау турында карар кабул ителгән. Хәзер муниципаль берәмлекләрдә торак йортларга һәм социаль объектларга җылылык биреп карыйлар.

А.Фролов белдергәнчә, 1 октябрьдән Татарстанның кайбер муниципаль берәмлекләре яңа режимга - куллану факты буенча җылылык энергиясенә түләүгә күчә. Аның сүзләренчә, бу төр түләүне фатирларын форточка ачып җилләтергә туры килгән гражданнар сораган. Әгәр элек җылылык өчен түләү ел дәвамында тигез итеп бүленсә, хәзер җылылык бирелә торган сигез ай дәвамында түләргә кирәк булачак. Җәй айларында түләү пункты счет-фактурадан юкка чыгачак. Яңа түләү системасына күчү карарын Татарстанның барлык шәһәр һәм муниципаль берәмлекләре дә кабул итмәгән. Түбән Кама, Биектау, Алабуга, Питрәч, Саба, Тукай, Чирмешән, Буа районнары һәм Казан җылылык өчен яңача түләргә булган. Ә менә Югары Ослан, Кукмара, Менделеевск, Нурлат, Спас районнары элеккечә түләячәк.
Татарстанда җылылык 20 сентябрьдән соң биреләчәк. Бу чорда "кайнар линия" дә эшли.