Урманченың үз йорты булды

Күптән көтелгән вакыйга - мәшһүр рәссам, сынчы, ТАССР һәм РСФСР халык рәссамы Бакый Урманченың туган авылы Күл-Черкене авылында Бакый Урманче музей-йорты ачылды. Ачылыш башкала кунаклары, авыл һәм район халкы катнашында узды. Тантанада катнашкан ТР Премьер-министры урынбасары - ТР авыл хуҗалыгы һәм азык-төлек министры Марат Әхмәтов әлеге зур эшнең инициаторы Буа муниципаль районы хакимияте башлыгы Рафаэль Әбүзәровка һәм музей-йортны төзүдә катнашкан осталарга, якташларының мирасын кадерли, олылый белгән Буа халкына олы рәхмәтен җиткерде. Район башлыгы исә килгән кунакларны, алга таба да бу юнәлештә эш дәвам ителеп, музей киңәйтеләчәк, дип ышандырды.
Халык шагыйре Ренат Харис, Бакый Урманченың татар мәдәниятендә тоткан урынын ассызыклап, Нәкый ага Исәнбәтнең сүзләрен искә төшерде: «Бакый Урманче - безнең сынлы сәнгатебезнең аксакалы. Бездән: «Татар шигъриятенә, татар музыкасына нигез салучы кем?» - дип сорасалар, без Тукай һәм Сәйдәш исемнәрен атыйбыз. Ә сынлы сәнгатьтә Бакый Урманче дибез».
Әлеге чара кысаларында музей-йорт янәшәсендә сынчының бюсты ачылу, режиссер Николай Морозовның («Иман» киностудиясе) Бакый Урманче үзе исән чагында төшерелгән документаль фильмы күрсәтелү тантананы тагын да баетып җибәрде.
Музей-йортта рәссамның кул җылысын саклаган кружка, карандаш, ручка, эскизлар төшерелгән дәфтәре һәм үлгәннән соң алынган битлек кебек шәхси әйберләре белән танышып була. Бер үк вакытта иҗатына да зур урын бирелгән. Нәкыш, графика белән беррәттән, Габдулла Тукай, Салих Сәйдәшев, Галимҗан Ибраһимов, Мәҗит Гафури, Нәкый Исәнбәт һәм Шәехзадә Бабичның скульптур портретлары да урын алган. Музейга 15ләп скульптураны сынчының улы Айдар бүләк иткән.
Бакый Урманченың 115 еллыгы уңаеннан шушы көннәрдә тагын бер зур вакыйга көтелә. Ул да булса, Б.Урманче премияләре тапшырылу. Әлеге олы бүләккә дәгъва итүче рәссамнарның эшләре ТР Сынлы сәнгать музеенда үз «хөкем»нәрен көтә.