Владимир Пучков Конфедерацияләр кубогы вакытында Казандагы куркынычсызлыкны тәэмин итү хакындагы утырышта катнаша

Казанга бүген эш сәфәре белән Россия гадәттән тыш хәлләр министры Владимир Пучков килде. Халыкара "Казан" аэропортында аны Рөстәм Миңнеханов һәм Татарстанның башка рәсми затлары каршы алды.

Татарстан Президентының матбугат хезмәте хәбәр иткәнчә, Владимир Пучков Казанга футбол буенча Конфедерацияләр кубогы вакытында куркынычсызлыкны тәэмин итүдәге әзерлеккә багышланган Хөкүмәт комиссиясе һәм Татарстан Хөкүмәтенең эшче төркем киңәшмәсендә катнашу өчен килгән.

Моннан тыш аның "Казаноргсинтез" һәм Казан вертолет заводларында, Зөя утрау-шәһәрчегендә, Иннополиста булуы, тармак эшчәнлеге белән бәйле башка берничә чарада катнашуы да көтелә, дип хәбәр итә Татар-информ.