Юлларда 7 айда 13 баланың гомере өзелде

Быелның 7 аенда республика шәһәрләре һәм авыллары юлларында 16 яшькә кадәрге балалар катнашында 352 юл-транспорт һәлакәте теркәлде. Аларда 13 баланың (8 пассажир һәм 5 җәяүле) гомере өзелде, 374е төрле авырлыкта имгәнүләр алды. Матбугат конференциясендә Татарстан буенча Эчке эшләр министрлыгының ЮХИДИ идарәсе җитәкчесе Рифкать Миңнеханов, «2006-2012 елларда юл хәрәкәте иминлеген күтәрү» турындагы федераль максатчан программаның таяныч елы булган 2004 ел белән чагыштырганда, республикада балалар һәлакәте 8гә кимесә дә, эшчәнлекне сүрелдермәскә чакырды. «Август - мәктәп укучыларының җәйге каникулларының соңгы ае. Бу чорда автомобиль транспортында балаларны йөртү бермә-бер арта. Ял лагерьларыннан, авыллардан кире шәһәрләргә кайткан балалар тирә-юньгә тиз генә ияләшеп китә алмыйлар. Узган ел 23-30 август аралыгында гына да 6 бала һәлак булды. Балаларның юллардагы иминлеген саклауны бер автоинспекторларга гына аударып калдырырга ярамый. Балаларның гомерләре өчен барыбыз да җаваплы», - диде Рифкать Нургали улы.
Балалар катнашындагы аварияләрнең 247 очрагында транспорт чараларын идарә итүчеләр гаепле, ә 142 очракта балалар автомобиль эчендә пассажир буларак утырып барган. Үлгән 5 бала автомобильдә махсус урындыкка утыртылмаган булган.
- Спиртлы эчемлек кулланып, руль артына утырырга ярамый. Арча районына 15 августта кунакка кайткан 29 яшьлек егет исерек хәлдә «Дэу Нексия» машинасына 8 һәм 15 яшьлек ике баланы утыртып, балыкка бара. Кире кайтканда, идарә итә алмыйча, машина чокырга төшеп ава. Нәтиҗәдә 8 яшьтәге бала үлә. Юлларда тизлекне арттыру да бик хәвефле. Автоһәвәскәрләр салонда кечкенә балалар булганда икеләтә саклык күрсәтсеннәр, - диде Рифкать Миңнеханов.
Балигъ булмаган балаларны автомобильләрдә махсус урындыксыз йөртүчеләрне ачыклау максатында рейдлар оештырылачак. Татарстан мәгариф министры урынбасары Гүзәлия Минкина сөйләгәнчә, мәктәпләрдә автоинспекторлар катнашында тематик дәресләр, аңлату-өйрәтү чаралары үткәреләчәк. Ата-аналардан да үз балаларына юл хәрәкәте кагыйдәләрен өйрәтүләре, автомобиль юлларында скутерларда һәм мопедларда йөрүләрен чикләүләре сорала. Һәлакәт чыкканнан соң үкенергә калмасын.