100 гә якын спортчы хисләр төрлелеген бию аша күрсәтте

Шоу Казан тамашачысына тәүге тапкыр күрсәтелде.

Татарстан Рәисе карары белән, Белем көне уңаеннан, тамашага 700дән артык күренекле укытучы, тәрбияче, педагоглар, тренерлар, психологлар чакыру алды. Сәхнәдә алар өчен егермеләп бию тарихы күрсәтелде, һәркайсы «Мәхәббәт» хисенең төрле төсмерләрен чагылдыра иде.

Тамашада 100 гә якын спортчы чыгыш ясады.  Катнашучылар арасында Бөтенроссия бию спорты, брейкинг һәм акробатик рок-н-ролл федерациясенең иң яхшы биючеләре, Россиянең атказанган спорт мастерлары, халыкара класслы спорт мастерлары, дөнья һәм Европа чемпионнары, Бөтенроссия ярышларында җиңүчеләр һәм призерлар бар. Бию спорты буенча Россия чемпионнары ирле-хатынлы Анна һәм Артем Ефанин сүзләренчә, спорт ярышларында көндәшлек рухы хөкем сөрсә, бу тамашада алар бер команда булып эшли.

Иң көчле спортчылар төрле жанрларда уникаль биюләр күрсәтте: дөнья классикасы шедеврларыннан алып заманча брейкингка кадәр тәкъдим ителде. Тамашаның тәэсир көчен арттыру өчен махсус эффектлар һәм ясалма интеллект мөмкинлекләре кулланылган.

Бөтенроссия бию спорты, брейкинг һәм акробатик рок-н-ролл федерациясе президенты Надежда Ерастова билгеләп үткәнчә, дөньяда бу тамашаның аналоглары юк. Беренче тапкыр ул Саха-Якутиядә күрсәтелгән, аннары ул Сочи, Краснодар шәһәрләре, Таҗикстан Республикасында узган. Инде менә Казанга чират җиткән.

Күренекле спортчылар үзләренең бию осталыгын күрсәтү өчен җыелды. Мәхәббәт турындагы җырлар һәм шигырьләр, төрле жанрдагы биюләр музыкантлар тарафыннан башкарылган классик әсәрләр – боларның барысы да мәхәббәт төшенчәсен чагылдыручы симбиоз. Һәр номер бу төшенчәнең бер кырын чагылдыра. Танылган язучы әйткәнчә, мәхәббәт дөньяны коткарачак, - дип билгеләп үтте Надежда Ерастова.

Татарстан Премьер-министры урынбасары Ләйлә Фазлыева тамашаның яңа Камал театры бинасында узуына сөенечен белдерде. “Башкалабызда тагын бер җылы чара уза. Чакырылган кунаклар биредән якты хис-кичерешләр алып кайтыр дип өметләнәм”, - диде ул тамаша башланыр алдыннан.