«Һәр ноктасы, һәр өтере үз урынында булсын»: яңа хезмәткәр хуҗасын ничек аптырашта калдырган?

Яше илле бишне узган абзыйны тырыш,  җаваплы хезмәткәр итеп кемдер тәкъдим иткән имеш. 

Байтак кына урыннарда эшләп өлгергән булып чыкты ул: Урта Азиясе дә, Себере дә калмаган. Бик тырыш, җаваплы  дип эшли башламас борын килеп төшкән хәбәрен без, исәп-хисап бүлегендәгеләр, аның “хезмәт биографиясенең” шактый чуарлы булуын, төрлечә юрадык. 

- Хезмәт хакы югары булмагандыр, бәлки.
- Гаиләсе аркасында күченеп йөрергә туры килгәндер.
- Үзе кебек тырыш һәм җаваплы хезмәткәрләргә туры килмәгәндер.
- Хуҗалары үзләренең урыннарына утырыр курыккандыр, һәм башкалар, һәм башкалар.

Ә менә бүлек мөдиребез – Харис Галимҗан улы, киресенчә, авызына су капкан кебек, бер сүз дә эндәшмәде. Бу вазифада шактый еллар эшләп, хаклы ялга киткән Суфия апаны юксынып тордымы,  еллык хисап вакытының килеп җитүен уйладымы, әллә бөтенләе белән башка сәбәбе булдымы, анысы безгә әлеге минутларда мәгълум түгел иде.

Хуш,  атна уртасында  төгәллек һәм сабырлык таләп итә, саннар артында яшеренган хакыйкатьне күрә белә торган вазифага дәгъва итүчебез үзе дә күренде. Уртача гәүдәле, ыспай гына  киенгән, калын күзлекле Фаризан абзый кабинетка эш сәгате башланырга бер минут кала килеп керде. Йөзендә җитдилек һәм бераз арыганлык та чагылгандай кебек тоелды безгә.

Бер атна  эшләгәч,  Харис Галимҗан улы аны  үзенә чакыртып тиешле мәгълүматларны барлап, хисапны эш сәгате тәмамланганчы башкарып чыгарга куша. Һәр ноктасы, һәр өтере үз урынында булсын, дип тә өсти. 

Фаризан абзый башын кагып: “Борчылмагыз, барысын да җиренә җиткереп башкарырмын”, – дип, хуҗаның кабинетыннан чыга да, эшкә чума.
Ул һәр санны микроскоп аша карап, һәрбер ноктасын, өтерен төзәтә. Көн кичкә авышкач,  Харис Галимҗан улы аның янына килеп:  “Бетәме?” –, дип соравына, артык пошынмый гына: “Әлегә нокталарны гына төзәтеп бетердем. Хәзер өтерләргә күчәм”, – дип җавап кайтарды. 

Хуҗабыз башын тотып: “Сез мине акылдан шаштырырасыз! Нинди нокта, нинди өтер?” – дип мыгырданды. Фаризан абзый күзләрен челт-мелт китереп: “Сез үзегез бит миңа һәр ноктасы, һәр өтере үз урынында булсын дип әйттегез”. 

Шул көннән соң, яңа хезмәткәребез озак эшләмәде, ә хуҗабызның чәчләренә күренеп чал ягылды.  “Тырыш,  җаваплы хезмәткәр” дип тырышып-тырышып  тәкъдим итүчене дә аңладык бугай – сез дә әзрәк җәфаланып карагыз  әле диюе булгандыр.

Фаризан абзый артыннан  үзенең “эзен” калдырып китте. Бүлегебездә өр-яңа сүзтезмә барлыкка килде: “Җиренә җиткер, әмма акылдан шаштырма!”

Люция Әблиева