«Кукмара Бабай» балаларның йөрәкләрен җылытты

Клуб вәкилләре Кукмара районы Мәчкәрә интернат-мәктәбендә тәрбияләнүчеләр өчен Казан шәһәренә экскурсия оештырды. Әлеге интернатта 55 бала белем ала. Шушы изге гамәл командада нинди хис-кичерешләр тудыруы турында без командага нигез салучы Артур Мөхәммәтшин белән сөйләштек.

Көн программасы вакыйгаларга бай булды. Беренче тукталыш Казан циркында иде. Анда балалар “Маршрут төзелде” тамашасын карадылар. Мавыктыргыч чарадан соң, балаларны тамак ялгап алыр өчен кафега алып бардылар. Соңыннан футбол клубы балаларга “Кукмара Бабай” символикасы төшерелгән кепкалар, туплар һәм печеньелар бүләк итте. 

- Бу көннең иң тәэсирле мизгеле турында сөйләгез әле.
- Бу команда өчен гади чара гына түгел, ә һәр катнашучыда тирән эз калдырган, чын эмоциональ тәҗрибә булды. Иң дулкынландыргыч мизгел, һичшиксез, балалар белән беренче очрашу. Аларның күзләрендә бер үк вакытта гаҗәпләнү, кызыксыну һәм җиңелчә сагаю күренә иде. Ләкин нәкъ менә шушы күзләрдә без ихласлык һәм ясалма булмаган хис-кичерешләрне сизеп алдык. 
Әле бер гаҗәеп бәйләнешне дә таптык: интернат директорының минем бабам таныш булуы ачыкланды. Авыр вакытларда ул интернатка ярдәм иткән булган. 
Әмма, мөгаен, иң көчле момент саубуллашу булгандыр. Балалар, үзләренең тыйнак һәм тәрбияле булуларына карамастан, иң мөһим сорауларны бирер өчен үзләрендә көч таптылар. “Ә сез тагын киләсезме?", "Без сезнең белән тагын очрашабызмы?”. Алар бу сүзләрне чын ихласлык белән әйттеләр, безнең, әлбәттә, алар белән кабат очрашасыбыз килә.

- Бу чара "Кукмара Бабай" командасының үз эчендәге атмосферасына йогынты ясадымы?
- Команда өчен бу көн кечкенә, ләкин әһәмиятле җиңү китерде. Биредә медальләр дә, турнир баллары да, матди файда да юк иде. Күпләр билгеләп үткәнчә, бу хис гадәти казанышлардан көчлерәк булып чыкты. Чара команда эчендәге атмосферага да сизелерлек йогынты ясады. Хәзер без составны яңарту һәм яңа уенчылар килү дәверендә. Аларга безнең команданың фәлсәфәсен җиткерергә кирәк һәм мондый чаралар аша без аларга шуны аңлатабыз. Бу безнең футбол турында гына түгел, ә җаваплылык, кешелеклелек һәм яхшылык турында да уйлавыбызны ассызыклады. 

- Интернаттагы балалар белән аралашканда иң истә калганы нәрсә?
- Балаларның үзләренә килгәндә, аларда тәрбия, ачыклык, юмор хисе һәм эчке ныклык бер комбинациягә җыелган һәм бу бик сокландыргыч. Юллары озын булуга һәм сәламәтлекләре белән бәйле кыенлыкларга карамастан, беркем дә зарланмады - киресенчә, балалар кызыксыну күрсәттеләр, чын күңелдән аралаштылар, шаярттылар. Бу көнне ике як та үзен бертигез уңайлы хис итте.

Илнар Камаев