Халык, милләт, туган тел хакын хаклап: Казанда Рамазан Кәбировка багышланган кичә узды

Октябрь аенда Казан кооператив институтының Дәрдемәнд исемендәге Татар мәдәнияте үзәгендә «Әдәпле әдәби җан» дип исемләнгән әдәби-музыкаль кичә булды. Кичә Татарстанның атказанган укытучысы, Россия Федерациясе һәм Татарстан Республикасы Журналистлар берлекләре әгъзасы Рамазан Кәбировка багышланган иде.

Рамазан Ибраһим улы Татарстанның Балык Бистәсе районы Югары Тегермәнлек авылында дөньяга килгән, озак еллар җирле үзидәрә рәисе, социаль приют директоры, мәктәп директоры булып эшләгән. Шәхес татар телебезне саклауда, әдәбиятыбызны баету да әйтеп бетергесез эшләр башкара. Нәшир ителгән саллы китаплары татар халкын мәңгелеккә илтәчәгенә шигебез юк.

"Балык Бистәсе төбәге мәгьрифәтчеләре" дигән җыентыгы, "Татар әдәбиятында Бөек Ватан сугышы темасының чагылышы" исемле китабы дөнья күрде. Әдәби тәнкыйтькә бәйле язмалары, иҗат бәяләмәләре белән "Әдәби хакыйкать" дигән мәҗмугасын бастырды. Татарстан дәүләт радиосы дулкынында аның әсәрләрен профессиналь сүз осталары яңгыратуы үзе бер тарих. Чарада Тәлгать Хаматшин сөйләвендә каләм иясенең әсәре яңгырады.

Кырык елдан артык татар теле һәм әдәбиятында эзләнүләре, фәннәр өйрәтүдә үзенә генә хас булган методик ачышлары шаккатыра. Очраклы рәвештә генә аның хезмәтләре югары бәяләнмәгәндер. Татарстан Республикасының атказанган укытучысы, Кадыйр Сибгатуллин исемендәге әдәби премия лауреаты,Татарстан Республикасының Мәскәүдәге вәкиллеге тарафыннан Муса Җәлилнең 110 еллыгы уңаеннан медаль белән бүләкләнгән була.

Россия кооперация университеты ректоры, Татарстан Дәүләт Советы депутаты Алсу Нәбиева чара башланганчы ук Рамазан Кәбировны тәбрик итте, исәнлек-саулык теләде.
Чарада Рамазан Кәбировка "Тукай түбәтәе" бүләк ителде.

Укытучылар көне алдыннан уздырылган чарада үзләре дә мәгариф өлкәсендә озак еллар хезмәт иткән үрнәк педагоглар катнашты. Мәгариф отличнигы, хезмәт ветераны, хәзердә сафта җәмәгать эшлеклесе Нурия Шәрибҗанова, озак еллар дәвамында Татарстан телевидениесендә, "Мәгариф" журналында бүлек мөхәррире булып эшләгән хезмәт ветераны Таһир Сабирҗанов, Татарстан китап нәшриятеннән килгән вәкилләр Рамазан Кәбировның эшчәнлеген югары бәяләде. Хезмәтләре өчен рәхмәтләрен җиткерде. Педагоглар яшь буынга үзләренең киңәшләрен бирде.

Казан педагогия көллиятенең югары категорияле татар теле һәм әдәбияты укытучысы Гүзәл Нигъмәтҗанова булачак укытучыларны алып килгән иде. Очрашуда Казан кооператив институты профессоры Алсу Вәлиева үз студентлары белән катнашты. Нәфис сүз остасы, Казанның Киров районы «Елга аръягы» балаларга өстәмә белем бирү үзәге педагогы Зифа Гәрәева Рамазан Кәбировның әсәрен сәнгатьле итеп сөйләде.

Башкортстаннан озак еллар мәгариф өлкәсендә хезмәт куйган, Россиянең мәгариф өлкәсенең мактаулы хезмәткәре Гәйнур Рахматуллина Рамазан Кәбиров иҗатына багышлап киләсе ел календареннән магнитлар эшләп җибәргән иде. Рамазан Ибраһим улы аларны һәр чыгыш ясаган кешегә үзенең китабы белән бергә бүләк итте. Башкортстаннан шагыйрә Рәсимә Ильясова Рамазан Кәбировка багышлап шигырь иҗат иткән. Югары бәяләрлек шигъри әсәрне үз укуымда тамашачыга җиткерүемә шатланып туя алмыйм. Евразия рәссамнәр берлеге әгъзасы Гөлсем Хаҗиева Рамазан Кәбировны халык шагыйре Роберт Миннуллин белән бергә зур итеп портретын ясаган. Әлеге сәнгать әсәрен Рамазан Кәбиров Дәрдемәнд исемендәге Татар мәдәнияте үзәгенә бүләк итте.

Әдәби-музыкаль кичәдә конкурслар лауреаты, җырчы Раил Гыйззәтуллин яраткан җырын башкарды. Иҗат кичәсе Габдулла Тукайның "Туган тел" җырын берлектә башкару белән төгәлләнде.

Халык, милләт, туган тел хакын хаклап яшәгән ил уллары булу безнең өчен зур мәртәбә.

Флюра Абдуллина

Фото Флюра Абдуллинаның телеграм-каналыннан