Ашаганың хәләлме?

«Татарстан» авиакомпаниясе пассажирлары хәләл ризык белән туклана ала. Ә аңа заказны авиакомпания кассаларында билет алганда ук биреп булачак.
9 апрельдән «Татарстан» авиакомпаниясендә бизнес-класс пассажирлары өчен түләүсез өстәмә хезмәт күрсәтелә башлады. Хәзер бизнес-класс пассажирларына үзләре өчен махсус вегетариан яки мөселман ризыгын сайлап алу мөмкинлеге тудырылган. Тиздән эконом-туклану рационын да яңарту планлаштырыла.
Авиакомпания өлкәсендә пассажирларга хезмәт күрсәтүнең бу беренче генә яңалыгы түгел. U9 367 Мәскәү (Домодедово) - Казан рейсы пассажирлары өчен авиакомпания «Трансфер» дигән яңа хезмәт күрсәтә башлады да инде. Хәзер Мәскәүдән Казанга 00:05тә очып килгән пассажирлар аэропорттан Казанга («Җиңү проспекты» метро станциясенә кадәр) шулай ук түләүсез бара алалар.