Айсылу Сөләйманова: «Бакчада җыйган кипкән чәчәкләрне ташларга кулым бармаганнан, панно ясарга тотындым»

- Айсылу, мондый паннолар ясау уе кайдан килде?
- Узган җәйдә бакчаны җыештырып йөргәндә булды бу. Чәчәкләрнең гомере кыска булса да, матурлыкның мәңгелек төшенчә икәнен беләм. Шуңа да бакчада җыйган кипкән чәчәкләрне ташларга кулым бармады, панно ясарга уйладым.

- Беренче эштән үк канәгать калдыгызмы?
- Үземә ошады, әмма баштарак башкаларга күрсәтергә кыймадым. Минем кадәр үк бәяләмәсләр дип курыктым. Иң беренче эшне бик озак һәм җентекләп башкардым. Хәзерге вакытта ул безнең өйдә эленеп тора. Эшләгәндә авырлык тоймыйм, чөнки яратып ясыйм. Композицияләрне алдан планлаштырмыйм. Алар эш барышында туа.

- Илһамны каян аласыз?
- Чәчәк кибетеннән. Анда мин үземә ошаган чәчәкләрне генә алам. Арзан шөгыль түгел, бу эш күп чыгымнар сорый. Киерге-панно - кулланма-гамәли сәнгать өлкәсендә яңа сулыш дияр идем. Ул шуның белән җәлеп итә дә. Эш процессы материалларны бер-бер артлы урнаштырудан гыйбарәт: башта киергегә тукыма беркетелә, аннары чәчәкләр һәм декоратив материаллар белән бизи башлыйсың.

- Эшең белән кызыксынучылар шактыйдыр.
- Узган елның сентябрь аенда заказга ясый башладым. Заказны күп алмаска тырышам, чөнки бу минем төп эшем түгел. Укыйсы да бар.
Паннога әллә ни исәп тотмыйм, әмма алга таба чәчәкләр белән эшләү, күз явын алырлык букетлар ясау теләгем зур. Башкаларга да яңача уйларга киңәш итәр идем. Талантыгыздан шикләнмәгез! Уңышның 99 проценты тырышлыктан тора дисәм, әллә ни яңалык ачмам. Моның өчен бары тырышырга һәм тагын бер кат тырышырга гына кирәк!