Кабак-көймә аш булачак

Британия артисты Дмитрий Галицын кечкенә чагында «Золушка» әкиятен бик яратып укыган, күрәсең. Кабактан транспорт чарасы ясап карау теләге башында күптән булгандыр аның. Үсеп җиткәч, кабактан затлы арба түгел, ә көймә ясаган ул. Шул көймәсе белән йөз метр арада иң беренче булып килүче буларак, Гиннессның рекордлар китабына да кергән хәтта. Бу кабак-көймә аның коллекциясендәге көймәләрнең берсе генә әле. Күптән түгел ул 500 килограмм авырлыктагы кабактан моторлы көймә ясаган. Әлеге транспортта диңгезгә сәяхәт итеп кайтканнан соң, дусларын көймәсеннән телне йотарлык аш пешереп сыйларга җыена икән.