«Парклар төзекләндерелә: «мәхәббәт йозакларын» вакытлыча алып торсагыз иде»

Парин урамындагы, Универсиада авылыннан "Җиңү проспекты" метро станциясенә кадәр сузылган, яшел зона тәртипкә китереләчәк. Биш-алты елдан соң студентлар кичләрен Парин бульварына чыгып, бушка алма ашап керә алачаклар.

- Бирегә җимеш бирүче агачлар утыртылачак,-диде шәһәр башкарма комитеты җитәкчесе урынбасары - тышкы төзекләндерү комитеты рәисе Игорь Куляжев "эшлекле дүшәмбе" киңәшмәсендә. Парин бульварында спорт, балалар өчен галәми эчтәлектәге уен мәйданчыклары, этләр йөртү урыны булдырылачак.

Горки-Әмәт урманлыгында велосипед һәм чаңгы юллары сузылачак, ерганаклар ныгытылып, күперләр салыначак. Урманлык үзәгенә спорт һәм балалар уен мәйданчыклары урнашачак. Игорь Куляжев ышындырганча, урманлыктагы агачларга, яшеллеккә артык зур зыян китерелмәячәк.

- Урицкий исемендәге парк яңартылачак. Андагы күперләр төзекләндереләчәк, шунлыктан әлеге күперләрдәге "мәхәббәт йозакларын" кешеләр вакытлыча алып китеп торсыннар иде. Йозаклар күперләрдән алынып, йә тимердән ясалган агачка, йә башка төрле сыннарга күчереләчәк,-дип искәртте Игорь Куляжев.

- Татарстан Президенты Рөстәм Миңнеханов тарафыннан узган ел игълан ителгән республика күләмендәге Парклар һәм скверлар елы быел да дәвам итә,- диде мэр Илсур Метшин, фикерләре белән уртаклашып,-яшел зоналарны, елга-күл буйларын төзекләндергәндә казанлыларның фикер-тәкъдимнәре бик мөһим. "Крылья Советов", Черек күл паркларында, Лядской бакчасында төзекләндерү эшләренең икенче этабы бара. Эшләрне 30 августка кадәр төгәлләү бурычы тора.


Сүз уңаеннан: Казанда 132 парк һәм сквер бар, аларның гомуми мәйданы - 300 гектарга якын.