«Абый, безгә аракы сатып алып бирә алмассызмы?»

Оятсызлык һәм җавапсызлык белән сугарылган бу күренеш көннән-көн киң тарала бара.
Хезмәткәребез әле шушы көннәрдә генә үзе белән булган бер очрак турында ачынып сөйләде. Ул Казан янындагы бистәләрнең берсендә яши. 

– Кичкырын батон, ипи алыр өчен җәяүләп кенә кибеткә киттем. Бина янында питбайкларына утырган 12-13 яшьләр тирәсендәге 3-4 үсмер тора. Шуннан кыюрагы яныма килеп: "Абый, безгә аракы сатып алып бирә алмассызмы?", диде. Әтиләре, бабайлары белән бер яшьтәге ир-атка шулай мөрәгать иткәннәреннән оялмыйлар да, күземә карап торалар. Оялтырга тырыштым үзләрен, әмма әхлак кагыйдәләрен өйрәтүемә алар, минемчә, төкереп кенә карады. Мин киттем, әмма алар үз “пост”ларында калды. Берәр мәнсезрәген барыбер табачаклар, һәм шул кеше аларга спиртлы эчемлек алып бирәчәк инде. Иманым камил. Җәмгыятебезнең күпме проблемасы ачыкланып күңелемне тырнады, – дип сөйләде ул безгә ачынып. 

Узган ел шуңа охшаш очрак гаиләм белән дә булды, кибетләрнең берсендә сатучы егет 14-15 яшьлек кызга сыра сатудан баш тартты. Әмма болар югалып калмады, үзләреннән соң чиратта басып торучы олы яшьтәге ханымга мөрәҗәгать итте. Белмим, нинди уйлар биләгәндер аның йөрәген, шул хатын аларга 5 шешә сыра алып бирде. Әмма ул үзенең гамәленең нинди нәтиҗәләргә китерүен аңладымы икән? Хәтта безнең кисәтүгә каршы да: “Сезнең ни эшегез бар анда? Кемгә телим, шуңа сатып алып бирәм”, диде дорфа гына. Юкса, салмыш хәлдәге үсмерләрнең җинаять юлына басуын да, бигрәк тә кызларның үз-үзләрен белештермәгән хәлдә булуларыннан файдаланып көчләнү фактлары күпме? Бихисап. Үзләре үк әни, апа яки сеңел булган затлар сыра сатып алып биргәнче, шуның аяныч нәтиҗәләре турында уйлансын иде.

Таш бәгырьле, битараф булмыйк, җәмәгать. Килер бер көн, үзебезгә үк җибәргән хаталарыбыз өчен түләргә туры килер.