"Болай да акча түлибез, тагын ни кирәк?"

Без диюем, мин - "Шәһри Казан" журналисты Эльвира Шакирова һәм минем белән кайткан популяр җырчылар Зәринә Хәсәншина, ИлГәрәй, Алсу Әбелханова, Дилә белән Булат Нигъмәтуллиннар. Казан артистлары өчен аерым сәхнә корылган иде. Биредә сәгать көндезге 11дән 2гә кадәр концерт куйдык.

Башта Теләчедә ничек каршы алулары турында бер-ике сүз әйтим әле. Безне Теләче районы Үзәк авылы клубы мөдире Илнур абый каршы алды. Машиналарны кертү буенча да сөйләшкән, сәхнә янына ук машина белән кердек. Анысы өчен рәхмәт аңа!

Казан артистлары өчен аерым шатер куйганнар. Ул артистлар өчен бик кирәк, чөнки машинада чишенеп киенү, бизәнү уңайсыз. Ләкин шатер эче буш булып чыкты. Ни урындык, ни көзге, ни эчәргә суы юк иде. Мескен кебек бер элгеч басып торды. Алсу Әбелханова җирдә яткан сумкасына, Зәринә Хәсәншина чирәмгә пакет җәеп утырды.

Белүемчә, башка районнарда артистлар өчен барлык уңайлы шартлар да булдырыла. Әллә "болай да акча түлибез, тагын ни кирәк?" дип уйладылармы икән... Шулай да татар халкы кунакчыл булырга тиештер инде ул. Әнә бит җитәкчеләр өчен нинди затлы табыннар корылган иде...

Сабан туеның рәсми өлешендә район хакимияте вәкилләре чыгыш ясады, шушы районда туып-үскән Рәсим Низамов, Алинә Сафиуллина һәм башкалар җырлады. Аннан соң төп концерт башланды. 

"Безнең" сәхнәдә иң беренче булып Зәринә чыгыш ясады. Ул җырлаганда, Алинә Сафиуллина, Алсу Әбелханова һәм ИлГәрәй сәхнә артында кемнең ничә Сабан туенда җырлавы, күпме акча эшләве турында сөйләште. Иң күп "заказ" Зәринәдә булып чыкты. "Бөтен Сабан туйларны Зәринә алган. Җырлап кына чыксын, монда бикләп калдырабыз аны", - диде Алинә шаярып.

Казан артистларын Теләчедә бик яраттылар. Тамашачы да шактый җыелды. Балалар хәтта сәхнәгә үк менеп биеде. Әлбәттә, кайсы артистның күпме акча эшләвен әхлак кагыйдәләре буенча без әйтә алмыйбыз. Әмма Теләчедә җырлаган артистларның бәясе 10 мең сумнан 40 мең сумга кадәр иде. Кайберләре көненә ике һәм хәтта өч Сабан туенда җырлый.